Shillong, K’lyngkot 29 : U National Vice President ka National People’s Party (NPP) bad Symbud Myntri Rangbah ka Jylla Bah Prestone Tynsong, ula ong ba baroh ki seng sain pyrthei kila kawang ktieh ia ka NPP namar ka jingpihuin ba kala nang kiew bad ba ka nang khlain bor.
“Baroh ki kren pyrshah bad kawang ktieh ia ka NPP namar ba kala nang kiew bad nang khlain. Ka jingkawang ktieh kan don beit shisien ba ngi khlain” ong u Bah Prestone haba kren ha ka jingialang paidbah ha Mawngap ha ka sngi saitjain, kaba la wan iashimbynta lang da u MLA ka Sohiong Samlin Malngiang, MLA ka Mawryngkneng Bah Pyniaid Sing Syiem bad kyrtong ka Mawphlang bah Kennedy C Khyriem lem bad kiwei kiwei.
U Bah Prestone ula ther tyngeh ruh ia ka paralok ba iatreilang ha ka Sorkar- ka United Democratic Party (UDP) ba kumno ba uwei na ki nongialam ula pynmih ia ka UDP-O. “Ka UDP ka lah kam ba kan jop haduh 31 constituency hynrei da lei lei ruh kan ym lah satia” ula ong.
Une u National Vice President ula pyntip ba dang shen ula wan sha Ri-lum Garo bad u thikna ba ka NPP kan jop haduh 14 seat na Ri-lum Garo.
“Kat kum ki khubor na Ri-lum Khasi-Jaintia, ka NPP kan jop haduh 19 seat. Namar kata, ngi thikna ba ngin jop haduh 35-36 seat ha kane ka elekshon ban wan. Ngin ap satang katto katne sngi bad ngin sa shimti biang ban pyniaid ia ka Secretariat” ula ong.
U Bah Prestone ula pynkynmaw ruh ba kumno ula kylla long u riew sain pyrthei naduh u snem 2003 bad ha ka jing treikam jong nga bad ki Sorkar bala leit noh haba iadei bad ka jingiakren halor ka kam kajia pud hapdeng ka Meghalaya-Assam, baroh ki shu kut da ka kyntien ban pynneh ia ka “Statud Quo”.
“Lada nga dei ban kylla ia ka ktien Status Quo sha ka Khasi kan mut ‘Sdeng ladui’….bad mynta ngi don ia ki Nongialam baieid jong ngi na ka TMC ha kaba ha ka manifesto jong ki, kila kular ba lada ki shah jied ha ka bor, kin pyndam noh ia ka MoU” ong u Bah Prestong.
“Ka TMC ka dei ka ‘Mynder Ri’ bad kin nym jop satia wat tang shi seat ruh (kawei ka constituency)” ong u Bah Prestone.
Ha kajuh ka por, u Bah Prestone ula pynkynmaw ba kumno ki Nongialam ba pawkhmat kum u MLA Samlin Malngiang bad u kyrtong ka Mawphlang Bah Kennedy C Khyriem ki dei kiba ialeh pyrshah hynrei mynta kila iathiah lang ha kawei ka kombor.
“Ha ka elekshon shiteng samoi, ka NPP kala pynieng ia u Bah Blah kum u kyrtong. Ha ka jingialap elekshon, ngi la thalain ia u Bah Samlin uba dang don ha ka HSPDP hynrei ula kyrshan ia u kyrtong ka UDP Bah Eugeneson Lyngdoh bad kumjuh ruh ia u Bah Kennedy C Khyriem u ba iakhun na ka Congress. Ngi la iakhun pyrshah ia ki hynrei mynta ngi la iathiah lang ha kawei ka kombor” ula ong.
“Wat ki nongialam ka ka UDP mynta kila don bad ka NPP bad ka kombor rit kam long shuh bad ngi la donkam ia ka kombor double size” ula bynrap.
Haba kyntu ia ki paidbah ka Constituency ban ai vote ia u Bah Kennedy, u Bah Prestone ula ong b aka NPP ka thikna ba u kyrtong jong ka, un jop hynrei ki paidbah kin pynjop ia u ym ban shu jop salit hynrei ban jop kput.
U Kyrtong ka Mawphlang Bah Kennedy Khyriem ula ong ba ka Constituency kala iaid shadien ha kine ki san snem bala leit noh. Ula ong ba lada ka NPP ka shah jied ban wan ha ka bor, kan pyndonkam ia ka top gear ha kaban wanrah ia ki kam pynroi, kaba lah ban leh da ka jingkyrshan jong phi ia nga.
Halor ka jingkynnoh ba ka NPP kala tyrwa pisa ia ki nongialam ba kin wan iasoh, u Bah Kennedy ula ong “Ngam pat ju shah tyrwa pisa ban iasoh sha ka NPP. Nga kloi ban iasoh bad ka party halor ki katto katne ki kyndon ba kan iarap ha ka ban wanrah ia ki kam pynroi hapoh ka Constituency”.
“Ngan pyrshang ban pynlong ia ka Mawphlang kum ka Model Constituency. Ka Constituency kam duna ha ka jingdon ki hospital lane ki jaka pule hynrei kaei kaba ka duna ka dei tang ka surok” ula ong.
“Hapoh ka Tnad PWD, bun tylli ki project la dep ban mang mynta bad kine ki project ki kot haduh T. 3 klur 24 lak. Kine ki dei ki kam kiba la jia hadien ba nga la iasoh sha ka NPP ha kine ki san snem” kam u Bah Kennedy.
Ha kajuh ka por, u MLA ka Sohiong Bah Samlim Malngiang ula kam ba ki skhim kila tuid puk puk ha ka Constituency jong ki. U ong ba ha kine ki 5 snem, ki project surok ba jan kot T. 230 klur kila wan poi ha ka Constituency.
“Kat kum ka thup jong ka khana samari, ka Sohiong Constituency, tang 2 tylli ki Shnong kim pat ioh surok. Ha Mawphlang palat 30 tylli ki syrok kim pat ioh surok. U Bah Kennedy ula trei shitom bad phi baroh phi khlem ai jingkyrshan satia…ta ka daw nga kyrpad ia u ban ai lem ia ka jingkyrshan ba un lah wanrah ia ki kam pynroi” ong u Bah Samlin.
