Guwahati, K’lyngkot 23 : U khlur ka Bollywood u Shahrukh Khan ula phone sha u Myntri Rangbah (CM) ka Assam u Himanta Biswa Sarma kumjuh ia u Rajeev Bora, CFO, Gold Cinema hadien ba u Himanta Biswa Sarma u la pynmih ia ka jingkren kynthoh da kaba ong ‘U Shahrukh Khan u dei u ei,’ kata hadien ba ki dkhot ka Bajrang Dal ki la pynlong ka jingthombor hapoh kawei ka cinema ha Narengi ha Guwahati.
“U aktor ka Bollywood u Shahruh Khan u la phone ia nga bad ngi la iakren hynnin ka step. U la pynpaw ka jingsngewkhia ha kaba iadei bad ka jingjia ha ka sorbah Guwahati ha ka por ba pyni ia ka phlim ka jong u.Nga la pynthikna ha u ba ka dei ka kamram jong ka sorkar jylla ban tehlakam ia ka jinglong jingman.Ngin pynlong ka jingtohkit bad pynthikna ba kum kine ki jingjia kin ym wan jia shuh,” ong u CM ka Assam lyngba ka twitter.
Ha kane ka sngi Saitjain ba la lah, hapdeng ka jingiakhih kaba jur da ki dkhot jong ka Bajrang Dal ha Assam ban pynpaw pyrshah ia ka phlim ‘Pathaan’ jong u Shah Rukh Khan ia kaba la thmu ban pyllait paidbah ha ka 25 tarik mynta u bnai, na ka liang u CM Sarma u la ong; “U dei uei uta u Shahrukh Khan? Ngam tip ei ei shaphang jong u lane ha kaba iadei bad ka phlim Pathaan ka jong u.” Nalor kata u CM ula ong kiba bun ki riew pawkhmat ka Bollywood ki la iakren bad u hashwa ka jingpyllait ia ki phlim ki jong ki bad ioh kin mih ki jingiakhih pyrshah, hynrei na ka liang u Shahrukh Khan um shym la pyntip ia u.
Haba kren sha ki lad pathai khubor, u Rajeev Bora, CEO, Gold Cinema ula ong “Ka dei ka jingjia kaba sngew bynniaw shibun.Ha ka sien kaba nyngkong ki la mih kiba kum kine ki jingjia hapoh Assam.Lada ki don jingwit bad ki Cinema, ngin ym pyniaid shuh ia ki cinema.Ngi pyniaid ia ki cinema na ka bynta ki paidbah.Ngi kyrpad ruh ia ki kynhun seng ba kin ym pynmih satia ia kiba kum kine ki kynrum kynram.”
“U Shah Rukh Khan u la phone sha nga halor katei ka jingjia.U la kyntu halor baroh kine ki jingjia bad pynpaw ka jingsngewkhia kaba jur halor kiba kum kine ki jingjia.Ka jingdon jong ki briew kiba la book lypa ia ki tiket ka la kiew shibun kat haduh mynta,” ong u Bora.
Shuh shuh u Bora u la kyntu ruh ia ki paidbah ba kin pynlong ia ki jingiakhih ha ki tyllong kiba iadei bad katei ka phlim lada kim kwah ban pyllait ia kane ka phlim, hynrei ym ban pynjulor ia ka cinema hall.
