Shillong, K’Lyngkot 23: U national president ka National People’s Party (NPP) u Conrad K Sangma u badei ruh u Myntri Rangbah ka jylla ula maham iaka nongialam ba hekhlieh duh ka All India Trinamool Congress (AITC) Mamata Banerjee ba bun ki MLA jong kane ka Party kin sa phet noh hadien ka ilekshon 2023.
Ia kane u Conrad ula kren ha ka jingialan ba la pynlong da ka NPP kum shi bynta ban sdang iaka jingpynkhreh ialap paidbah naka bynta ka ilekshon 2023 kaba la sdang napoh ka shnong Adokgre North Garo Hills ha ka ba palat 20000 ngut kki paidbah nongkyrshan kila wan ban iashim bynta.
U Conrad ula pynpaw ia ka jingsngew burom ia ka Khliehduh ka TMA ka Mamata Banerjee naba shisien kala kyrshan ia u Kpa (L) PA Sangma. Da ka jingburom, nga kyntu ia ka ban peitngor iala ki jong ki briew ha Jylla, haba ong ba bun ki nongia lam kila don jingthmu lypa ban phet n aka party tang mar syn kut ka elekshon.
“Madam Mamata Banerjee, kiba bun ki Nongialam kila pyniasoh bad phi mynta, kiba bun ki Nongialam na ki seng sain pyrthei bapher bapher kila iasoh bad ka TMC. Hynrei nga ong ha phi bad kane kam dei ba ong ma nga u Conrad Sangma, kane ka dei ka jingiakren bad ka khana ha iew ha hat bad phi lah ban kylli nangno nangno ruh, phi don bun ki briew ha ki lain bapher bapher kin sa iathuh ia phi ba bun na kine ki Nongialam bala pyniasoh sha ka TMC mynta kila don jingthmu lypa ban mih na ka TMC mar syn kut ka elekshon. Kila don ha ka jingiasylla bad kiwei ki seng sain pyrthei, kila dep iakren ruh bad bun ngut ki briew. Nga khlem ong ma nga ia kane, kine ki dei ki kyntien ha iew ha hat, ha ka jylli sain pyrthei” ula ong.
U Conrad ula kam ba kala don ka jingiakren bad kane ka khana kala pur ha kylleng ka jylla Meghalaya ba bun ki nongialam ka AITC Meghalaya kin sa mih noh na kane ka seng tang mar sien dep ka ilekshon kaba ban long ha ka 27 tarik Rymphang.
Ula kyntu ruh iaki paidbah ba kim dei ban iatreilang bad kum kine ki nongialam namar lada ki lah ban phet kynsan na ka Party kaba la ai Ticket iaki, kin leh kumjuh iaki paidbah lada ki ai ka jingkyshan iaki haka por ilekshon.
Ha kajuh ka por, u Conrad ula thalain kylla ia ka TMC halor ki jingkynnoh pyrshah ia u bad ia ka party jong u. Ula niew ruh ia ka TMC kum ka Party Nongwei, kumba pynman ka TMC ia ka BJP ha ka elekshon West Bengal.
“Ka TMC ka dang thymmai ha Meghalaya bad ka dang donkam bun bah ka por ban lah suhthied hangne. Ki Nongialam ki dei kiba la rim, kiba la wan naka Congress bad kiba la don ka lad ban shakri ia ka Meghalaya mynba ki dang don ha ka Congress hynrei kila pheil. Ka TMC kam pat sngewthuh ia ka thain Shatei Lam Mihngi bad ki briew, ka dang donkam bun ka por, ka dei ka nongwei ha Meghalaya kumba pynman nongwei ka TMC ia ka BJP bad ia kiwei ki National Party ha ka elekshon West Bengal” ong u Conrad.
