Shillong, K’Lyngkot 23: Ki nongtrei ka Khasi Hills Autonomous District Council (KHADC) hynne ka sngi kila sangeh treikam syndon ban pynlong ka jingiakhih shong kyllaiñ mongor ha phyllaw ka KHADC ban dawa ban pyllait noh ia ka Arrear bad ka DA ka ba la sahkut mynta la kumba shi snem tam.
Ha kane ka sngi, la iohi kumba ki don palat spah ngut ki nongtrei ka KHADC ki ba la mih ban iakhih daka ba shong kyllaiñ mongor bad la sakhi ruh ba ki karma treikam jong ka District Council kila kynjah lut bad ym don shuh uwei ruh hapoh ki karma treikam.
Haba iadei bad kane u Chief Executive Member (CEM) ka KHADC bah Titosstarwell Chyne u u la iathuh ba u khlem tip eiei ba ki nongtrei baroh ki shong bad pep trei namar ki khlem pyntip ba kin sangeh trei mynta ka sngi.
U bah Titos u la pynpaw ba kum u khlieh ka KHADC u sngewthuh iaka jingeh ki nongtrei namar ka jingslem ban pyllait iaka Arrear bad DA hynrei ki nongtrei ruh kidei ban kloi ban wan iakren bad u khnang ban pynbeit iaki jingeh ki nongtrei.
Ula ong ba kum u CEM ka KHADC un pyrshang ban pynurlong iaka jingdawa ki nongtrei bad un ialeh katba lah pynbiang iaka tulop noh man la u bnai kum shi bynta ban pynthikna ba ki nongtrei kim dei ban duh ia ka tulop.
“Nga kyrpad ia ki nongtrei ba kin ap bad iaishah shipor ba ngin sa leh iaka ba donkam khamtam haba iadei bad ka jingpyllait tulop man u bnai namar nga sngewthuh iaka jingeh ba ki nongtrei ki kynduh lada kim ioh iaka tulop bad kumjuh ruh lada ki duh iaka Arrear bad DA” ong u bah Titos.
U bah Titos ula pyntip ruh ba ula rai ban pyllait noh haduh 50 percent ia ka Arrear bad ka DA bad shen un sa iakren bad u Deputy CEM ha ba iadei bad kane ka jingdawa ban pyllait lut iaka Arrear bad DA jong ki nongtrei.
