Shillong, K’lyngkot 19 : Ka All India Congress Committee (AICC) hynne ka sngi palei, kala kynnoh ia ka BJP ba ka pyrshang ban phiah ia ki paidbah ka Ri India bad khamtam ha Meghalaya halor ka jingsngew iapher niam.
Ha ka kyrwoh bala pyllait da ki Media Coordinator ka AICC ka Bobbeeta Sharma bad Adv Mathew Anthony bad Sanjoy Das, General Secretary ka Meghalaya Pradesh Congress Committee, (MPCC), kine ki lain gut kila ong “ Ha ka histori ka Jylla Meghalaya naduh ba ioh jylla pura ha u snem 1972, hato ngi ju ioh sngew ba ki Iingmane kin shah thombor? Em. Hynrei haba ka BJP kala wan ha ka bor ha Delhi bad ha Jylla, ka jingthombor ia ki ritpaid bad ki Iingmane kala jia na ka por sha ka por ha baroh kawei ka Ri bad mynta wat ha Meghalaya. Ka dei ka jingthombor ym tang ia ka Niam jong phi hynrei ia ka snap kyrpang jong phi”.
Haba pynpaw ba ka Congress ka ngeit ha kaban burom lang kumjuh ia baroh ki Niam bad ki deiriti, bad ngeit ha ka jingpynneh pynsah ia la ka jong ka snap kyrpang, kila ong ba kane ka snap kyrpang mynta kala don hapdeng ka jingshah thombor.
“Namar kata ngi kyrpad ia ki paidbah ka Jylla Meghalaya ba kin long kiba tip bad puson bha ia kaei ka nongrim jong ka BJP bad kaei kaba ka Congress ka ieng” kila ong.
Kila kam ruh ba ka Congress ha kane ka kynti ba mynta kan iakhun ia ka elekshon ha Jylla da ki samla bad ki riewsain pyrthei bala rangbah kiba don ia ka mynsiem ban shakri.
“Ngi don ia ka kynhun ba thymmai kiba trei shitom, bad ba kit ia u paidbah. Kim dei tang kiba la nang la stad hynrei kiba don jingiadei bad ki riew paidbah naduh ki shnong ki thaw. Ngi kmen ruh ban ong ba phi lah ban iohi ia ki nongialam kynthep ha ka jylli na ka Congress ha kane ka kynti ruh mynta” kila ong.
Lah ban kdew, ka Election Commission of Inida hynnin ka sngi balang kala pynbna ba ka sngi thep vote ha ka elekshon MLA-2023 ha Jylla kan long ha ka 27 tarik Rymphang bad ka jingniew vote kan long ha ka 2 tarik Lber.
Ka thma ktien bad ka jingiakawang ktieh jong ki Political party kala sdang mynta ban ioh ia ka jingshaniah na u paidbah.
