Shillong, K’lyngkot 19 : U Prof Prabha Shankar Shukla, Vice Chancellor ka NEHU, hynne ka sngi palei, ula iakynduh ia u Myntri ka Tnad Education ka Ri Dharmedra Pradhan ha Delhi ban pyntip ia ki kam ba iadei bad ki kam pynroi hapoh ka University bad ban kyntiew biang ia ka NEHU sha ka nam kaba mynshuwa.
U Vice Chancellor ula pyntip ha u Myntri halor ka jingiaid ki kam pynroi ha NEHU ha kine ki shisnem bala leit noh ba kynthup ia ka jingbuh ia ki Centre bapher bapher kum ka Design Innovation Centre, Office jong ka International Affairs, ka IPR centre, MOOCs centre bad ka Research Cell nalor kiwei kiwei.
Ula pyntip ruh halor ka rukom pyniaid ia ka jingthungkam Nonghikai kaban sa pyndep ha kine ki lai ne saw bnai ban wan, ia kaban sa pynbud ia ka jingthungkam ia ki Nongtrei.
Khnang ban lah pynsted ia ki kam pynroi hapoh ka University, u Vice Chancellor ula iakren halor ka mang tyngka ba donkam da ka University bad u Myntri, uba la pyni dak ban sa leh eiei.
