Shillong, K’lyngkot 19 : Ka Nongialam ka All India Congress Committee (AICC) Bobeeta Sharma hynne ka sngi palei kala kynthoh ba ka Bharatiya Janata Party (BJP) kan sa nguid tylli ia ka National People’s Party (NPP) bad kiwei ki seng riewlum hapoh ka Jylla.
Haba iakren bad ki nongthoh khubor, ka Sharma kala ong baka BJP kala shongkulai ia ki seng riewlum bad kan sa nguid tylli ia ki.
“Kim don kyrtong ha Assam hynrei kila shong kulai ha lyndet jong ka Asom Gana Parishad (AGP) bad kila pyrshang ban plie lynti ialade ha ka Jylla Assam. Kumjuh ruh, kin sa leh ia kane kajuh hangne. Haba phi wan na Guwahati phin iohi bun tylli ki poster ka BJP la kumba ka (Meghalaya) ka dei ka Jylla BJP. Kane kam dei ka Jylla BJP namar ka don tang 2 ngut ki MLA hynrei ka NPP shen kan sa shah nguid tylli ha ka BJP. Kane ka dei ka khubor b aka ai bad dei namar kata ba kam shym la weng ialade naka Sorkar MDA naba ki don la ka jong ka jingkwah” ong ka Sharma.
Ka ong ba u Presient ka BJP-Meghalaya Bah Ernest Mawrie dalade ula kren sha ki lad pathai khubor ba ka Sorkar MDA ka dei ka sorkar ba bamsap.
“Phi lah ban pyrkhat hangne ba lada ka paralok ba iatreilang ka ong baka sorkar ka dei kaba bamsap hynrei ha kajuh ka por da kaba burom ia u Bah Ernest, ula khot ia ki nongthoh khubor hynrei um shym la nud pat ban leh kat kum ka jingkren. Phi lah ban kyrpang ia ka jingmut jong u hangne” kala ong.
Ka Bobeeta ka ong ba ka Congress kam pat ju pyrshang ban nguid ia ki seng riewlum bad bynrap “Ka Congress kala ailad ia ki ba kin nang san bad ka long kaba kongsan ban don ia ki seng riewlum bad ia ki jingkwah jong ki hynrei ka BJP ka shu kwah ia ka party ba kan jop namar kim don satia ia kata ka jingsngew riewlum”.
U Mathew Anthony uba dei ruh u Media Coordinator ka AICC ula ong ba ka BJP ka don ia ka jingkhwan myntoi da kaba neh sah bad ka Sorkar.
Ula ong ba dei ka BJP kaba pyndkoh ia ka Shiv Sena ha Maharashtra bad ka All India Anna Dravida Munnetra Kazhagam (AIADMK) ha Tamil Nadu.
