Shillong, K’lyngkot 19 : U President ka BJP Meghalaya Bah Ernest Mawrie, ula thalain ia ka All India Trinamool Congress (AITC) bad kynnoh ba ka Sorkar jong kane ka party ka dei kaba bamsap tam bad kala pheil ha ka jingtreikam ha West Bengal.
“Khie leit peit ha West Bengal, phin sa iohi ia kaei kaba jia ha katei ka Jylla…ka Trinamool Congress kala pheil nadong hadong, ym don kam pynroi ha West Bengal” ong u Bah Ernest.
U Bah Ernest ula ong ruh ba ka BJP kan jop na baroh ki seat ha ka elekshon Panchayat ha West Bengal, ka ban long ha u bnai Naitung 2023.
Halor ka jingkam jong ka Chairperson ka AITC Mamata Banerjee ba tang ka party jong ka, kaba lah ban ai ia ka sorkar kaba shakri bha ia ki paidbah ka Meghalaya, u Bah Mawrie ula ong ba lada ki paidbah ki peit bad bishar ia kiei kiei baroh, ka Jylla West Bengal ka dei kaba pheil. “La ka dei ha ka shongsuk shongsain bad ka dei ruh ka Jylla ba jur eh ka bamsap” ula ong.
U Bah Ernest ula kynthoh baka WE Card Scheme jong ka AITC ka dei tang ka jingkular elekshon bad kaba pynmih tang na ki “rymmiang shyntur’ jong kane party na West Bengal sha ki paidbah ka Jylla Meghalaya.
“Ngi la lum lut ia baroh ki jingtip, ki kam pynroi kila pulom lut ha ka Jylla West Bengal bad ka shongsuk shongsain ha kane ka Jylla ruh kala nang sniew” ula bynrap.
