Shillong, K’lyngkot 16 : Ka Sorkar Jylla hynne ka sngi nyngkong, kala iasoi ia ka soskular bad ka Riat Laban Dorbar Pyllun ban shna ia ka Ropeway na Shillong Viewpoint (Lum Shillong) sha Forest Nursery, Riat Laban.
Ia ka soskular “aiti ia ka jaka” la iasoi hapdeng ka Tnad Tourism ka Sorkar Meghalaya ha ka jingiadonlang jong u Myntri Rangbah ka Jylla Conrad K Sangma ha Lum Shillong.
Kane ka Ropeway kan dei kaba nyngkong eh ha Jylla Meghalaya bad kan dei sa kawei pat ka lynti iaid sha Shillong Viewpoint lyngba ka Roepway na Shillong Viewpoint sha Forest Nursery, Riat Laban.
Kane ka project ka ban pynieng ha ka jaka ba 1.34 hectare, ka dei kaba la mang ban pyntrei ha ka jinglut jingsep ba kot T. 138 klur.
Haba kren ha ka jingialang, u Myntri Rangbah ka Jylla ula ong “Ka kam jngohkai ka dei kawei pat ka kam ba kongsan eh jong ka Jylla kaba la noh synniang bha sha ka ioh ka kot bad kyntiew ia ka jingsengkam sengjam ha ki jaka nongkyndong. Ngi la pynmih ia ka Homestay scheme ha kaba haduh 2500 tylli ki Homestay la don mynta ha baroh kawei ka Jylla. Kiwei pat ki sienjam bala shim ki kynthup ia ka jingplie ia ki Five Star Hotel bad ka jingpyllait ia ki Luxury Vehicle Scheme. Kine kin pynmih da ki hajar tylli ki lad iohkam ha ki jaka nongkyndong bad ha jaka sor bad ban pynlong ia ka Meghalaya kum ka jaka wanjngohkai”.
“Ka Ropeway ka dei kawei pat ka sienjam ba ngi la pyrshang ban wanrah kum kawei pat ka kam jngohkai kaba pher. Nga kwah ban ai khublei ia ka Riat Laban Dorbar Pyllun kaba la aiti ha ngi ia ka jaka ban pyntrei ia kane ka ropeway project” ula ong.
