SHILLONG, JAN 16: Ka BJP State Election Committee kan sa shong bishar bniah bad ban phah ia ka kyrteng jong ki kyrtong kiba pan ticket ban iakhun ia ka Elekshon MLA-2023, sha ki nongialam ha Delhi ban ioh iaka jingmynjur.
Ka jingthep kyrteng jong ki kyrtong kiba pan ticket na ka BJP kala kut noh hynnin ka sngi.
Ka BJP kala ioh pdiang iaki aplikeshon najan baroh 60 tylli ki constituency, la iathuh u Vice President ka BJP Meghalaya u Dipayan Chakraborty hynnin ka sngi.
“Ia kitei ki aplikeshon yn sa khmih bniah da ka State Election Eommittee bad hadien kane yn sa phah pat sha ki nongilam ha Delhi ba kin ai iaka jingpynbna” la ong u Dipayan.
Ula pyntip ba ki don ki Constituency kaba ki nongpan tiket ki don palat iaka 3 ngut bad la khmih lynti ba kin bud ryntih iaki jingbthah ka Party.
Ki MLA ka BJP ha Meghalaya kiba kynthup ia u Bah Sanbor Shullai na South Shillong bad Bah AL Hek na Pynthorumkhrah kila dep ban aiti iaki aplikeshon ki jong ki.
U President ka BJP Bah Ernest Mawrie na West Shillong bad u Nongaiktien ka seng Bah M Kharkrang na North Shillong kidei kiwei na ki nongialam ka seng kiba la dep ban aiti iaki aplikeshon ki jong ki.Hynrei nalor u Bah Kharkrang, wat u Bah Michael Kharsyntiew ruh ula pan ticket na North Shillong.
U Dipayan Charkraborty ula pyntip ba iaka ticket yn sa pynkhamti ha u kyrtong kat kum ka jingwad bniah ka party.
“Ka party kala dep ban pynlong iaka jingwad bniah bad bun kiei kiei kala dep ban pyndep bad halor katei yn sa ai ticket ia u kyrtong uba biang tam,” ong u Dipayan.
Une u nongialam ka BJP ula iathuh ba u President ka BJP ha ka lah sngi U Blei un leit sha Delhi ban iashimbynta haka National Executive Meeting ka ban long ha ka 17 tarik mynta u bnai.
“Hadien bala wanphai u President, ka SEC kan sa sdang ban khmih bad bishar bniah ka ka aplikeshon jong ki kyrtong khamtam ba ka ECI ka lah ban pynbna noh iaka tarik ban pynlong iaka elekshon noh ha kano kano ka por. Kumta ka Central Parliamentary Party kan sa shong bad ban pynkhreh iaka thup kyrteng kaba pura jong ki kyrtong ban iakhun iaka elekshon” ong u nongialam ka BJP.
