Nongpoh, Kyllalyngkot 15: Uwei u briew u la mynsaw katba u wei pat u la lait salit, ha ka jingjia aksiden kaba shyrkhei hapdeng kawei ka kali Volkswagen bad ka Auto Rickshaw, kaba la jia hynne ka nohphai sngi ha ka por 12 shiteng eiei hakhmat ka Bethany Outreach Hospital, Pahamsyiem, Nongpoh.
Katkum ka jingtip ba la iohlum, la iathuh, ba kawei ka kali Volkswagen kaba don ia u number AS FF 5590 kaba la niah sted bha da u wei u Kautav K Kalita na , kala leit tynrah ia kane ka autorickshaw kaba don ia u number ML 10 A 8361 kaba la niah da u Bah Starling Dohling (47) bad ha kane ka jingjia, u wei pat u ba la shong lang ha kane ka auto u ba la tip kyrteng kum u Subas Maring (26) na Mawdiangum u la mynsaw.
Haba ioh jingtip kane ka jingjia, ki pulit ka Nongpoh Traffic Branch ki la leit marmar sha katei ka jaka ban pynlong ia ka jingtohkit bad kila pynkit noh ia u ba mynsaw sha Bethany Outreach Hospital na ka bynta ki jingsumar kiba kyrkieh. Na ka liang ki pulit ki dang pynlong ia ka jingtohkit.
