Shillong, K’lyngkot 14: U Myntri Rangbah ka jylla Conrad K Sangma hynne ka sngi Saitjain ula pyllait paidbah iaka kor internet 5G jong ka kompani Airtel ka ban sdang pyntreikam hapoh ka Nongbah Shillong.
“Nga ai khublei iaka kynhun jong ka kompani Airtel baroh kawei, kaba long ka kompani ba nyngkong eh ban sdang pyntreikam iaka kor internet 5G bad shen kin sa pyniar ia kane ka jingshakri sha kiwei pat ki bynta jong ka jylla Meghalaya ha kaba ki paidbah ka nongbah Shillong bad ka jylla baroh kawei kin sngewtynnad ban pyndonkam iaka High Speed 5G” ong u Myntri Rangbah.
Ia mynta kane ka kor 5G kan treikam shuwa tang ha Laitumkhrah, Lapalang, Nongrah, Iingsah u Lat, Lummawbah, Jaiaw Laitdom, Pines Colony (Laban Red Cross), Mawpat, Riat Sohkhlur bad katto katne ki jaka.
Ula ong lyngba ka 5G kan plie lad ha kaban ai ka jingshakri ia ki paidbah ha ka lynti kaba biang bha bad kiwei kiwei ki kam ai jingshakri haka liang ka koit ka khiah, ka rep ka riang bad kiwei kiwei kan long ka jingmyntoi lyngba ka jingdon jong ka 5G.
Ha kane ka jingpyllait paidbah iaka 5G la iadonlang u Chief Secretary ka jylla u Bah DP Wahlang, ki heh ophisar ka sorkar bad ki heh jong ka Airtel.
