Shillong, K’Lyngkot 14: U myntri khynnah ka sorkar pdeng ba dei khmih iaka tnat Electronics bad Information Technology u Rajeev Chandrasekhar ula kynnoh ba ka jingkular ka All India Trinamool Congress (AITC) kadei tang ka buit shim kabu.
Haba kren sha ki lad pathai khubor u Rajeev Chandrasekhar u pynrem jur iaka AITC kaba ialam bakla iaki paidbah daka ba pynshit ba ka BJP kadei ka Party ba lehbein iaki rit paid.
U la ong kumno ka AITC ka kular ban aikam haduh 3 lak ki samla katba ki samla hapoh ka jylla West Bengal ba synshar da kane ka juh ka Party ki mad ka jingkyrduh kam.
Ula ong ba ka jylla West Bengal ka ioh khyndiat palat ki jingmyntoi naki kompeni shimet bad naka liang ka tnat Technology bad Electronics kala thaw kam haduh 18 lak hynrei ym don ba wan ban sengkam hapoh kane ka jylla.
“Ka suk eh ia kum kine ki sengsain pyrthei ki bym lah ban wanrah jingmyntoi haka liang ka roi ka par ban kular hynrei baroh ki tip ba kine baroh kidei tang ki jingkular kwah myntoi bad ban shim kabu na ki paidbah” la ong u Rajeev.
Ula ong ba kane ka jingkular ha Meghalaya kadei ka juh jingkular ba ka AITC kala kular kum ha Goa bad ki paidbah jong kane ka jylla ruh kila kyntait mardor namar ki tip ba kine ki jingkular kidei tang ki jingkular shim kabu.
U Rajeev ula kam ba ka AITC kadei ka Party shim kabu katba ka BJP kadei ka Party ka ban wanrah kam pynroi hapoh ka jylla bad ha baroh kawei ka ri.
“Ka party jong ngi ka la shim khia ban ban trei naka bynta ki paidbah namar naka liang u myntri rangbahduh ka ri ula kren shai ba donkam ban trei naka bynta ban tei iaka lawei ka ri bad kum ka Party ngim ju wan tang haka por ilekshon ban kular iaki paidbah hynrei ngi kular bad ngi pyndep iala ka kamram naka bynta ki paidbah” la ong u Rajeev.
Haba pynrem iaka AITC kaba ialam bakla iaki paidbah daka ba thok ba ka BJP kadei ka party ba leh bein iaki riew ngeit Kristan bad rit paid, u Rajeev ula ong ba kane ka jingpyntieng ka AITC kadei namar ba kam don buit shuh da kiwei ki buit ban iakhun pyrshah iaka BJP.
U Rajeev ula ong ba ka AITC kam don Record ba ka la wanrah ki kam pynroi bad dei namar kane ka ialam bakla iaki paidbah daka ba thok ba ka BJP ka pyrshah iaki riew ngeit Kristan bad rit paid.
Ula ong ba ia kine baroh naka liang u myntri rangbahduh ka ri u Narendra Modi un sa pynshai lut namar u don ka phang ‘Sabka Sath Sabka Vikas’ kaba mut ban kyntiew naka bynta baroh.
“Dei namar kane ki paidbah kidei ban sngewthuh ba ka BJP kam dei kaba pyrshah rit paid ne riew ngeit Kristan kumba la kynnoh ka AITC” u la ong.
Haba iadei bad ka jingkynnoh ba ki paidbah ka Meghalaya kim pdiang iaka BJP, u Rajeev Chandrasekhar ula kam ba baroh ki paidbah ka thain North East bad ha Meghalaya ki pdiang iaka BJP namar dei hadien ka jingwan ka BJP ha ka bor, ba ki kam pynroi ki sa kiew sted ha kane ka thain.
Ula ong ba ka jylla Meghalaya bad ka thain shathei lam mihngi (North East) baroh kawei kala shah ieh khunswet hynrei u myntri rangbah duh ka ri u don ka thong ban kyntiew iaka thain, ki kam pynroi ruh kila wan sdang wan sha kane ka thain.
“Haba kiwei ki Party kim don lad shuh da kum wei ban ialeh pyrshah iaka BJP, ki shna khana thok da kumne kumtai hynrei naka liang ka Party ruh kan sa leh iaka ba donkam ban pynshai paidbah halor kine baroh” ula ong.
