Pynbna ba khuid ka NPP halor ka jingpynlut elekshon
Shillong, K’lyngkot 13: Ka Election Commission of India (ECI) hynne ka sngi thohdieng kala ong ba ka jingpynbna ia ki skhim ne kular ia ki jingai jingmyntoi sha ki nongthep vote shuwa ka elekshon, kam dei satia ka jingpynkhein ia ki Ain kiba don ha ka Ri.
Kane ka long kongsan haba phai sha ka jingpyntreikam ka Sorkar MDA ba ialam da ka NPP ia ka skhim FOCUS kaba ai jing myntoi ia ki paid nongrep bad kumjuh ruh ka jingkular jong ka All India Trinamool Congress (AITC) lyngba ka WE Card bad MYE Scheme-kaba kular ban ai song jingiarap pisa sha ki Kynthei bad ruh sha ki samla khlem kam khlem jam.
Haba kylli ia kaei kaba u Chief Election Commission (CEC) Rajiv Kumar u don ban ong halor kine ki skhim, khamtam ia ka WE Card bad MYE Scheme ka AITC bala pyllait dang ha u bnai bala lah, ula ong ba kine ki jingkular kim dei satia ki jingpyn khein ia ki ain ba don namar ka dei ka rukom ha ka elekshon ban ai ki jingkular ia ki nongthep vote bad ka dei ruh ka hok jong ki nongthep vote ban tip ia kaei kaba la kular.
“Ki don ar bynta halor kane :Kawei ka dei ki Political Party kiba pyrshang ban khlei ia ki jingkular sha ki nongthep vote..Kane ka dei ka hok jong ki bad ka dei ruh ka hok ki nongthep vote ban tip ia kaei kaba la kular bad ruh ban peit la ki long kiba iahap ne em lane kin dei kiba lah pyntreikam ne em” ula ong.
U Kumar ula ong ba mynta ka jingiatai kala iaid hapoh ka ri halor kine ki jingkular jong ki Political Party. Hynrei ka ECI kam lah ban shu khang ia kine ki jingkular ba ki rukom ba ju leh baroh shikatta, khamtam haba ka Model Code of Conduct (MCC) kam pat treikam satia.
“Ngi la khmih ia kine kiei kiei baroh la ki long kat kum ki ain ba don bad ki jingbthah jong ka Commission” ong u Kumar.
Haba iadei bad ki jingkynnoh ba ka NPP kam shym la lah ban ai ia ki jingkhein halor ka jingpynlut ha ka elekshon bala lah, u Kumar ula pyntip ba ka NPP kala dep ban ai jingkhein. Hynrei, ula kubur baka don ka jingpynslem haba bynrap ba kiba bun ki Political Party ha ka Ri ki ju pynslem ban ai ia ki jingkhein jingdiah ba ki pynlut ha ki elekshon.
Halor ka jingujor bala mudui pyrshah ia u Myntri Sorkar ba kynnoh sam pisa sha ki paidbah ka Nongkrem, u Kumar ula pynpaw ia ka jingbym pat don jingtip halor kane bad un pan jubab na u CEI halor kane ka kam.
“Haba wan kino kino ki jingujor sha ngi, ngi ju bthah shuwa ia baroh ki DEO ki register bha ia barohki jingujor bad sa leh ia kaba donkam” ula ong.
