Shillong, K’lyngkot 13 : U Deputy Chief Whip ka Sorkar Bah Pyniaid Sing Syiem ha ryngkat u Myntri barim bad MLA Bah Hamletson Dohling, hynne ka sngi thohdieng, kila buh mawnongrim ban siang maw bad siang rong noh ia ka surok Mawklot-Sohtyngab-Mawkhan.
Haba ai jingkren, u Bah Pyniaid ula iaroh ia u Bah Hamlet halor ka jingiai tynruh ia ka Sorkar Jylla lyngba ka Tnad PWD ban ioh ia ka mang tyngka na ka bynta ban shna ia kane ka surok kaba la shah iehbein bad kaba pyniasoh ia ki artylli ki Shnong.
Nalor ka umbam umdih kaba khuid, u Bah Pyniaid ula bynrap ba ki surok ba bha ruh ki dei kawei na ka jingdonkam ba hakhmeh eh jong ki paidbah ha ka imlang sahlang.
La bun bun snem, kane ka surok kaba pyniasoh ia kine ki artylli ki Shnong ka dei kaba la shu ieh shrah bad ki nongshong shnong khamtam ki khynnah skul kila mad ia ka jingeh kaba khraw khamtam ha ka por lyiur, ong u Bah Hamlet uba dei u MLA ba dang shu iehnohkam dang shen.
Ia kane ka surok ba jrong kumba 1 Km eiei yn tei ha ka mang tyngka ba kot T. 2 klur.82 lak. Kine ki artylli ki Shnong ki dei ruh ki shnong kiba iajan bha bad ka shnong ba sah u MLA barim ka Congress bad MDC ba mynta Bah Ronnie V Lyngdoh.
Ha kane ka sngi, u Bah Hamlet ula pynbna ruh ba yn sa pyllait noh shen ia ka pisa ba T. 70 lak na ka bynta ban shna pynbha ia ka madan ialehkai phutbol ha ka thain.
