Nongpoh, K’lyngkot 12 : Lai ngut ki Khynnah kila khlad hashen katba uwei pat ula lait im na ka jingpluh kynsan jong u skum kba ba ki ialehkai. Kane ka jingjia kala jia hynne ka sngi palei ha Khlieh Umtrew, Mawhati, Ri-Bhoi.
La iathuh ba napdeng kine ki heprit ba khlad, arngut ki dei ki synrap kiba dang ha ki 2 snem eiei, uwei pat u dei uba dang 3 snem tam katba uba lait im u dei uba la don kumba 4 snem eiei.
La iathuh ba kane ka jingjia kalajia ruh ha ka por ba ki Kmie Kpa jong kine ki heprit kim shem la don satia ha Iing ha kaba kine ki heprit kila ialehkai ha phyllaw iing kaba don ruh kawei ka thliew kaba la tip bad pyndap da ki skum kba ban ialehkai.
La iathuh ba katba kine ki heprit ki dang ialehkai, uwei na kine ki heprit ba khlad, ula sei ia ka jingpruid bad thang ia u skum kba ha kaba ka ding kala klang kynsan katba lai ngut ki dang ialehkai ha thliew. Ka ding kala pur sted bha bad kala bamduh ia ka mynsiem jong kine ki khynnah haduh ba kin da khlad noh hashen.
Haba ioh jingtip ia kane ka jingjia, ki Pulit ka Ri-Bhoi kila hiar mar mar sha katei ka jaka ban pynlong ia ka jingtohkit bad hadien ka jingkyrpad ki bahaiing hasem, la pyllait noh ia ka jingleh post mortem hadien ka jingpan bor na ki bor pyniaid ka District.
Hadien ka jingpyndep ia baroh ki jingdonkam bad ka jingtohkit, la ailad noh ia ki bahaiing hasem ban pyndep ia ka jingleh niam kaba khatduh bad leit on tep ia ka met ba sah jong kine ki heprit ha ka 12 tarik u Kyllalyngkot ha ka shnong Khlieh Umtrew.
