Shillong, K’lyngkot 12 : U Myntri Rangbah ka Jylla Conrad K Sangma hynnin ka sngi Balang, ula pynpaw ia ka jingsngew skhem ba un wanphai kham khlain shuh shuh na South Tura ha ka elekshon MLA ban wan bad ong ba ka jingkylli kam mih satia ba u don hapdeng ka jingkhuslai ban nang jop.
“Kam don ka jingkhuslai, Ngi la skhem, ngi la trei shitom, ngim khein sting satia ia kaei kaei ruh bad ngi la thikna ba ngin nang jop biang na South Tura” ong u Conrad haba iakren bad ki nongthoh khubor.
U Myntri Rangbah ula kynthoh ia kane halor ka jingkynnoh jong u MLA barim ka South Tura John Leslee K Sangma ba ula wah ia ki dur lajong ha manla ki 10 meter ha Tura namar ka jingkhuslai ioh shah rem.
Haba niew ia kane ka jingkynnoh kaba thamula, u Conrad ula ong ba ia kine ki dur la wah da baroh ki nongialam haba plie ia kino kino ki project, kam dei satia kaba thymmai bad “Ngam tip nangno ka jingkylli ba nga khuslai ka mih tang namar ka jingwah dur”.
“lada phi peit ha kino kino ki Sorkar lane kino kino ki prokram jong ka Sorkar Jylla ne Sorkar Pdeng ba kum kine, ka ju don beit ka jingwah dur…namar kata ngam iohi ba kan don jingiadei bad ngam don eiei ruh ban kynthoh ia ki jingkren ba thamula kum kine” ula bynrap.
Halor ka jingkam u Nongialam ka BJP Bernard N Marak ba ula don bynta lang ha ka jingjop jong u ha ka Bye-Election 2018 ha South Tura, u Conrad ula ong “Phi iohi 13000 ngut ki briew kila vote ia nga bad ha u ban ong b aula pynioh lut ia baroh 13000 vote ka long kabym dei satia. Kum u briew shimet hi, hooid kila iarap , baroh kila iarap hynrei ban kam ba dei namar jong u ba nga jop ka long ka bym iahap”.
“Ngam kyntait ba u la trei shisha na ka bynta jong nga ha katei ka por bad ula iarap bad kyrshan kum u riew shimet, um shym la don satia bad kano kano ka party, hynrei ban kam pat ba ngi la jop namar jong u, nga sngew ba ka dei kaba la shu pynksan jubor” ula bynrap.
Haba kylli la ka NPP kan jied ia u kyrtong CM kat kum ka jingjop jong ki MLA na Ri-lum Khasi-Jaintia bad Garo, u Conrad ula ong “Kane ka dei ha kato ka por jong ka elekshon bala dep namar ngi la iawanlang ha kum katei ka khep ha katei ka por. Kaei kaba jia ba long hadien habud, kan shong ha ki MLA ki ban jied ia u Nongialam bad namar kata, ka shong ha ki MLA bad ngam don eiei ban ong ia kata”.
Halor ka jingkynnoh jong ki paralok ba iatreilang bad ka MDA pyrshah ia ka NPP, u Myntri Rangbah ula pynpaw ba u long uba kloi ban pdiang ia baroh ki jingkynnoh kum u Nongialam.
“Ha ka por ba nga shimti ia baroh ki jingbahkhlieh kum u Myntri Rangbah ha u snem 2018, nga hap ban long uba la pynkhreh ia baroh kine ki jingtynjuh bad nga shim ia ka jingkitkhlieh ia baroh bad nga la ju ong ruh ba haba mih kano kano ka jingjia, nga ju mih shakhmat bad ju ong ba nga hap ban shim ia ka jingkitkhlieh bad ngam sngew eiei ladaka Liang Pyrshah ne ki paralok ba iatreilang ha ka Sorkar ki ong ia kata” ula ong.
Haba iadei bad ka jingkynnoh jong ka Liang Pyrshah ba ka Sorkar kala plie ia ki project ki bym pat pyndep satia kynthup ia ka Ganol Hydro Power Project, u Myntri Rangbah ula ong ba ula dep pynbna da kaba shai haba plie ia kane ka project ba ka dei tang jong kawei ka Unit katba artylli kiwei pat ki Unit yn sa plie paidbah noh hapdeng ka 15-30 sngi eiei.
