Shillong, K’lyngkot 12 : Lai ngut ki briew la suba ba kila iap na ka jingtwa jong ka par dewiong ha East Jaintia Hills District hynnin ka sngi.
U Myntri Rangbah ka Jylla Conrad K Sangma ula ong ba ka Sorkar kam pat ioh satia ia kano kano ka jingpynthikna halor kane ka jingkynnoh twa par dewiong kaba wanrah ia ka jingiap ki lai ngut ki briew.
“Ngim pat ioh satia ia kano kano ka jingpynthikna halor kane ka jingjia. Ngi la shu iohsngew ia kane na ki katto katne ki jaka hynrei kam pat don satia ka jingpynthikna” ong u Conrad.
U Superintendent of Police ka East Jaintia Hills Jagpal Singh Dhanoa ula ong ba la pynthikna ba lai ngut ki briew kila iap ha ki artylli ki shnong- Musniang rim bad Musniang hynrei ym pat lah satia ban pynthikna ia ki daw ka jingiap.
Haba kylli la ia kine ki metiap la lap na krem dewiong, une u Heh Pulit ula ong “Ngim pat tip ia ka jaka ba jia. Ngim pat lah ban pynthikna la ki iap na ka jingtih dewiong ne em”.
Ula iathuh ba laingut ki samla trai shnong kila iap ha ki artylli ki shnong ba marjan ha ka 9 tarik Kyllalyngkot bad ia kine ki briew la dep ban tep.
“Ngi la shim ia ki jingbatai (statement) bad lada donkam, ngin hap ban leit khlong ia ki metiap bad leh ia ka post mortem” ula ong.
U pyntip ba ka jingtohkit mynta ka dang iaid shakhmat ban shim ia ka jingbatai jong ki bahaiing hasem kine ki briew.
“Ngi kyrmen ba ki bahaiing hasem kin batai thik kumba la jia khnang ba ka jingtohkit kan iaid shakhmat. Lada la lah pynthikna ba ki iap lang ha kajuh ka jaka, ngin sa pynleit jingmut sa sha ka jaka ba jia bad u trai jong ka par” ula ong.
