Shillong, K’Lyngkot 09: Namar ka jingshah thombor ki riewngeit Kristan ha kylleng ka ri India, nga la shim iaka rai ban mih noh naka sengsain pyrthei ka Bharatiya Janata Party (BJP) ban pyniasoh shaka United Democratic Party (UDP).
Ia kane la ong u John Leslee Sangma hadien ba ula shah pynbna ba udei u kyrtong ka United Democratic Party (UDP) u ban iakhun pyrshah ia u Myntri Rangbah ka jylla Conrad K Sangma bad u MDC ka BJP U Bernard Marak na South Tura constituency.
Haba kren sha ki lad pathai khubor u John Leslee ula ong ba haka jingshisha udei u nongialam ba rangbah ka BJP Meghalaya hynrei ula shim iaka rai ban pyniasoh sha ka UDP namar u kwah ban don bad ka Party kaba iakhun naka bynta ka bha ka miat ki rit paid bad kumjuh ruh ka party kaba don ka nongrim ban iada iaki niam Khristan ha kylleng ka ri India bad ka jylla baroh kawei.
“Hadien ba sdang mih biang ki jingshah thombor ki riew ngeit Kristan, nga sngew ka long kaba bakla ia nga ban iai neh bad ka BJP bad dei namar kan,e nga la shim iaka rai ban ia snohkti lang noh bad ka party kaba don iaka nongrim ban iada iaki rit paid ne ki riew ngeit Kristan” la ong u John Leslee.
U John Leslee ula kob ba un ioh ka jingjop na South Tura namar ki paidbah kin kyntait iaka BJP namar ka jingbym lah ban ai jingiada iaki Kristan ne ki rit paid bad ki paidbah kin kyntait ruh ia u Myntri Rangbah ka jylla u Conrad K Sangma, namar naduh ba u long Myntri Rangbah um don por naka bynta ki paidbah ka constituency.
Ula ong ba kumba iohi mynta u Conrad u don hapdeng ka jingtieng bad kulmar jingmut bad dei namar kane ki nongtrei ka National People’s Party (NPP) kila shu bunkam ban wah iaki Banner bad ki dur jong u Conrad ha man la 10 mt tang ban pynthame iaki paidbah ka konstitwensi.
Shuh Shuh ula bynrap ba ki paidbah ka South Tura konstitwensi kidei kiba stad bad kin sa kyntait ruh ia u kyrtong ka BJP u Bernard Marak namar ki jingshah kynthoh ba bun jait namar ha kane ka juk, ki paidbha kim kwah ban don jingiadei bad kino kino kiba la shah kem.
“Kumba ka paw mynta, ki paidbah kin paw khmat shaka UDP namar kadei ka Party kaba khuid bad kaba don iaka nongrim ban iada iaki rit paid bad kumjuh ruh iaki Kristan ha kylleng ka jylla Meghalaya bad ka ri India baroh kawei” la bynrap u John Leslie.
