Pynkup burom ia ka Longkmie ba ioh National Award
Nongstoiñ, K’lyngkot 9: Ka Dorbar pyllun ba 16 jong ka Synjuk ki Kynthei Katholik Nongstoiñ Diocese, ha ka sngi U Blei ka la ïoh ban pynlong ïa ka jingïaseng kyrpang da kaba buh ruh ïa ka phang pdeng kaba ong, “Ka Kynthei kaba stad ka tei ïa la ka ïing, hynrei ka jingbiej ka pynpra ïa ka da ki kti lajong”, kaba la pynshong nongrim ruh na ka jutang barim jong ka Kitab Jingphawar 14 ka lynnong dkhot ba nyngkong 14.1
Ïa katei ka jingïalang la pynlong ha Divine Mercy Parish, Umdang, kawei na ki shnong ha ka thaiñ Shallang West Khasi Hills District, kaba la sdang ruh naduh ka sngi thohdieng janmiet. La don ruh ka jingïapuson ïa katei ka dkhot bad ban ïaphylliew jingmut bad ban ïatai nia ban pynsngewthuh kham jylliew ïa kitei ki kyntien U Blei.
Nalor kitei, la pynlong ruh ïa kiwei kiwei pat ki jingïakop kiba kynthup ïa ki jingïapyni riam jaiñ phong kaba katkum ka Bible, ki jingkyntip bad kiwei kiwei kum shi bynta ban long ruh kum ki jingpynbyrngia, hynrei kiba don pat la ki jingmut bad kiba shongkhia.
Ha ka sngi U Trai pat la sdang ïa ka jingleh niam da ka jingtyrwa ïa ka jingkñia Mass Bakhuid da u Rev.Fr Anselm Nonglang u ba dei u Diocesan Administrator jong ka Nongstoiñ Diocese, ïa kaba la pynlong ha phyllaw ka ïingmane bad ba ki paid riewngeit jong ka Balang Katholik, ki la wan ban sakhi lang ïa katei ka sngi ba kyrpang jong ki kynthei na ki parish bapher bapher kiba na ka jylla niam Nongstoiñ.
Hatei ka sngi la ïoh ruh ban pynkup burom ïa ka Kong Icylda Nongrum kaba na Nongstoiñ Parish, halor ka nongrim ba katei ka longkmie ka la ïoh ïa ka National Award na ka CCBI Women Commission, kum kawei na ki longkmie kaba tbit tam ha ka thaiñ Lammihngi jong ka Ri India.
Ym tang katta hynrei ha katei ka sngi la ïoh ban pyni paidbah ruh ïa ka khusnam jong ka jylla niam Nongstoiñ, kaba la ïoh ïa ka nam kum ka “Best Diocese in India” na ka liang jong ka Women Commission.
Ha katei ka jingïalang la ïadonlang ryngkat kiwei kiwei ki lyngdoh sohblei kiba kynthup ïa u phadar Cosmos Jyrwa, Parish Priest ka Divine Mercy Parish, Umdang bad kiwei kiwei ki phadar, ki sister, ki brother bad kiwei kiwei. U Bah Gigur Myrthong MLA/MDC jong ka Mawshynrut konstitwensi ruh u la wan ban sakhi lang ïa katei ka sngi.
Ha ka jingïaseng kaba ar la pynkut noh ïa katei ka jingleh niam da ka jingmane sacrament bad la ïoh ban sam pat ïa ka ktien jong U Blei da u Rev phadar Sylvester Nongsiej.
Haba pharia ïa ka Ktien U Blei da u phadar Sylvester u la ong, “Ki longkmie ki dei kiba don ïa ka sap bad ka buit kaba kyrpang, kiba dei ki nonghikai ïa la ki khun ki kti ban pynsan ha ka jingnang jingstad kumjuh ruh ha ka jinglong mynsiem”.
“Khublei shibun ïa ki longkmie kiba long ka dohnud ïa ka imlang sahlang, kiba ïaishah kiba trei shitom, kiba don bynta ha ka kamai kajih, ha ka pule puthi, ha ka kam shakri Blei bad kiwei kiwei de. Lada ki synjuk longkmie jong ngi ki long ki bym peit ïa kaba sniew, ki bym sngap ïa kaba sniew bad ki bym kren ïa kaba sniew, ka pyrthei kan long ka Paradais ïa ngi”, ong utei u Lyngdoh.
