Shillong, Kyllalyngkot 08: Ki shipai BSF ryngkat bad ki pulit ka jylla haka sngi Saitjaiñ kila ioh kurup 11000 Kg u kwai tyrkhong uba shongdor T.24 Lak ia uba la khaïï be-aiñ na ri India sha Bangladesh.
Hadien ba ki shipai BSF kila ioh ia ki jingtip kiba paka ryngkat ka jingiatreilang bad ki pulit, kila pynlong ia ka jingkhynra haka thaiñ Dampukaphal kaba hap hapoh Rongra Police Station, South Garo Hills.
Ia kitei ki kwai tyrkhong la pynkit lyngba ki 3 tylli ki trok bad haba ki BSF bad ki pulit kila bat ia kitei ki trok hynrei ki nongniah jong ki trok kila phet krad na katei ka jaka.
Ki shipai BSF Meghalaya kila iaroh ia ki pulit ka jylla kiba la iadonbynta lang ha katei ka jingkhynra bad kila pynpaw ba nangne shakhmat kin iai bteng ban ia khynra lang da ka jingthmu ban rat dyngkhong ia ki kam sniew ha ki thaiñ khappud.
