Dimapur, K’lyngkot 08: Ka Working Committee (WC) jong ka Naga National Political Groups (NNPG) ka la kynthoh tyngeh pyrshah ia u heh nongialam ka BJP u Temjen Imna Along halor ka jingkynnoh pynthud ha kaba iadei bad ka jingiakren sain hima jong ki Naga.
Ka WC ka dei ka kynhun kaba kdup ia ki hynniew tylli ki seng kieng atiar kiba la pynbna ia ka jingsuk bad ka sorkar pdeng.
“Ka sorkar BJP hapoh Delhi ka la pyrshang ia kaba bha tam ban pynioh ia ka jingsuk kaba neh ha Nagaland lyngba ka lynti jong ka jingiakren, hynrei ka BJP ha Nagaland ka la ialehkai bad ka ding, ” Pynpaw ka WC.
Kane ka kynhun ka la ong ba ha ka 9 tarik u Naiwieng ba la dep ka la phah ka shithi sha utei u nongialam ka BJP na ka bynta ban pynlong ka jingiakren halor ki mat kina kongsan hynrei um shym la kheinsnep satia ia kane ka jingkyrpad ka jong ki. Da kaba kynthoh da ki kyntien kina tyngeh pyrshah ia u Along, ka WC ka la kynnoh da kaba ong; “U Along u dei u briew u bym don nongrim, u riewshim kabu bad uba khim mynsiem. Un hap ban shim ka jingkitkhlieh halor ka jingialam bakla ia ka jaidbynriew Naga bad shukor ia ki nongialam ka BJP hapoh Delhi.
Nalor kata ka WC jong ka NNPG ka la ong ruh ba kan ym shah ia uba kum une u briew ba un mihkhmat ia ka jaidnynriew Naga, kata la kalong ha Kohima lane ha Delhi.
“U Temjen Imna Along u la leh bym suitniew ha kaba iadei bad ka mat kam sain hima sima jong ki paid Naga bad pyrshang ban pynpulom ia ka jingiaid shakhmat jong ka jingiakren hapdeng ka sorkar India bad ki nongialam jong ki kynhun Naga.
