Shillong, K’lyngkot 07 : U Myntri Rangbah ka Jylla Conrad K Sangma hynne ka sngi saitjain, ula thalain tyngeh ia ki katto katne ki Nongialam kiba pynlong ishu ia ki kam pynroi bala ai da ka Sorkar sha ki paidbah ka Ri-lum Garo.
U Myntri Rangbah ula kynthoh ia kane halor ki jingkynnoh ba iadei bad ka PA Sangma Sports Complex ha Tura, West Garo Hills District.
“Ka long kaba sngewsih ba katto katne ki Nongilaam kila pynlong ishu khamtam haba ki paidbah kila ioh ia ki kam pynroi. Ka paw pynban ba kine ki Nongialam kiba kren ia kane khamtam ki Nongialam na ka thain kiba kren ia kane, ki dei ki briew ki bym kwah ba ka kam pynroi kan wan ha Tura. Kim kwah ba ki kam pynroi kin wan sha Ri-lum Garo jong ngi, kim kwah ba ka roi ka par kan wan sha Meghalaya bad dei namar kata haba ki iohi ia ka jingwan ki kam pynroi, kila pynmih ia ki jingkynthoh pyrshah..ka long kaba sngewsih” ong u Conrad haba iakren bad ki nongthoh khubor.
U Nongialam ka BJP bad MDC ka Tura Bernard N Marak, dang shen ula buh jingkylli ia u Myntri Rangbah ka Jylla Conrad K Sangma halor ka rai ban plie ia ka PA Sangma Stadium namar ba ka dei ka project ka bym pat dep pura.
Haba kylli, u Myntri Rangbah ula ong ba kane ka project ka don arbynta-ka bynta ba nyngkong ka dei ka stadium phutbol bad kaba ar dei ka Indoor Stadium.
Ula pynshai ruh ba ka Indoor Stadium ka dei ka bym pat sdang bad namar kata tang ia ka bynta ba nyngkong jong ka Stadium phutbol ka dei kaba la lah ban pyndep.
“Kam sngew iahap ia ngi ban khot kat ia u Myntri ka Sorkar khlem da pyndep ia ka bynta kaba ar. Hynrei namar ka bynta ba nyngkong ka dei kaba la dep, lada phim plie noh, yn ym lah satia ban pyndonkam bad namar lada ym plie noh bad shu buh kan sa shu jot ei. Ta ka daw, haba buh ha ka jingmut jingpyrkhat ba ka project kam pat dep pura namar ba dang sah ka Indoor Stadium, kam sngew iahap ia ngi ban khot ia ki Myntri na ka Sorkar Pdeng. Namar kata, kum u Myntri Rangbah ka Jylla, nga la plie hi bad kane ka ju jia ha kiba bun ki prokram. Kum ka nuksa, mynta ka sngi nga la plie ia ka JJM scheme ha kiba bun ki jaka bad kam long kaba iahap ia ngi ban khot ia ki Myntri na Delhi tang namar ka JJM” ula ong.
U Conrad ula ong ba ka jingkylli kam mih satia ba la pynkhun ia ki paia haba bynrap “Ka dei ka World Class Stadium kaba la shna bad ka dei ruh kaba nyngkong eh ha ka thain Shatei Lam Mihngi bala shna da ka prefab structure”.
“Lada u ( Bernard) u thew sha ki jingpynkhun kiba don ha ki mawkyndon shadien jong ka stadium ia kaba nga antad ba ka dei, kane ka dei ka rukom ba kumno ki mynkyndon ki long. Kam dei satia ban long kaba beit bad ka dei ban iaid khun…Lada u kdew ia kane, kane ka dei kaba iaid kat kum ka jingpynwandur” ong u Conrad.
