Shillong, K’lyngkot 06 : U Nongialam ka Liang Pyrshah bad Myntri Rangbah barim ka Jylla, Dr Mukul Sangma hynne ka sngi thohdieng, ula ther tyngeh ia ka Bharatiya Janata Party (BJP) halor ka jingkynnoh ba ka don ia ka jingmut kaba sniew bad kyntu ia ki paidbah ka Jylla ba kin ai ia ka bainong kaba dei ha kane ka elekshon MLA ban wan ha Jylla.
U Dr Mukul ula kynthoh ia kane halor ka jingkam jong ki Nongialam ka BJP ba “Ym don ba lah ban thaw Sorkar ha Meghalaya khlem ka BJP ha u snem 2023”.
“Kaei kaba ki thmu ban ong? Hato ki thmu ban thied ia ki MLA? Hato ki thmu ban leh ia ki kam bamsap?. Kane ka phalang ia ka jingthmu kaba sniew, ka jingmut jingpyrkhat kaba jakhlia. Nga sngew ba ki paidbah ka Jylla ki dei ban ai ka bainong” ong u Dr Mukul haba iakren bad ki nongthoh khubor.
U Dr Mukul ula ong ba ka dei ka jingstad jong ki paidbah ka Jylla ba ym shym la don BJP ha u snem 2010 bad 2013. “Kila pyrshang ban iaid tam wat ia ka rai jong u paidbah, ka jingmut jong ka riti synshar paidbah. Ka dei kaba ktah jur ia ki nongthep vote bad nga kwah ban pynrem ia kane” ula bynrap.
Ha u snem bala lah, u President ka BJP-Meghalaya, Bah Ernest Mawrie ula kam ba kaei kaba paw sha madan madan ka long ba ym don ba lah ban thaw sorkar khlem ka BJP ha u snem 2023.
Ula kren ia kane halor ki jingiakam jong ki seng sain pyrthei halor ka jingioh khur ia ka jingjop ba bun eh ha kane ka elekshon MLA ban wan ha Jylla bad ong ba baroh ki seng sain pyrthei kila tei ia ki Iingsyiem halor suin.
