Shillong, K’lyngkot 06 : Ka seng Ri-War Development Organisation (RWDO) kala pynpaw ia ka jingpyrshah kaba jur ia ka jingthmu jong ka Sorkar ban pynhap lang ia ka Pynursla Constituency sha ka District thymmai kaban sa pynkha- ka Sohra District.
Kat kum ka kyrwoh na u Bah Tensing Khonglah, Working President, la ong “Ka seng RWDO ngi phah ia ka kyrwoh sha ka Sorkar MDA ba ngim lah ban pdiang da lei lei ruh em ioh lehse kane ka Sorkar kan pynhap lang ne kdup lang ia ka Pynursla Constituency hapoh ka Sohra District kaba kin sa thaw thymmai”.
“Ka daw ka long ba ngi pyrshah halor ka jinglong ka iaid ka ieng, ka lynti ka syngkien ka bym iahap bad ngi ki paidbah ka thain Ri-War Pynursla ngin sa mad shibun ki jingeh ha ka jaka ban wanrah jingsuk” ula ong.
U Bah Tensing u ong ba kum ka seng kaba peit ia ka bha ka miat ki paidbah, kam don kano kano ka jingpyrshah ia ki paidbah nongshongshnong ka thain Sohra ba kin dawa ban ioh noh la ka jong ka District.
“Ngi ai ka jingkyrshan ba pura hi ruh ia ki ba kin ioh noh ia kane ka District lajong. Hynrei tang kawei kaba shai ba ngi kum ka seng, ngi pynpaw ba phin sngewbha ban nym kynthup lang ia ka Pynursla Constituencyka jong ngi ha ka map jong ka Sohra District jong phi namar ngi la rai beit ban don ha ka East Khasi Hills District kumba ju long ju man na ki por sha ki por” ula ong.
“Ka daw hi ka long ba ngi kham suk bad kham jan ban pyndep ia ki kam ki jam ki jong ngi sha Shillong kaba dei ka Head Quarter jong ka East Khasi Hills” ula bynrap.
Une u Nongialam ka RWDO u pyntip ba ka seng kan sa phah da ka jingthoh sha ka Sorkar halor kane ka jingpyrshah.
