Shillong Kyllalyngkot 05: Ka tnad election jong ka jylla ha ka 5 tarik u Kyllalyngkot kala pyllait paidbah iaka Electoral Roll ne ka thup kyrteng jongki nongthep vote ha Meghalaya kaba la kot sha ka 21,61,129 ngut.
La sdang iaka Special Summary Revision 2023 ne SSR-2023 ha ka 9 tarik u Naiwieng 2022 ha kaba ka jylla kala sdang iaka Draft Publication of Electoral Rolls ha kylleng ka jylla.
Kila don 63763 ki nongthep vote kiba thymmai kiba la applai lyngba ka Form 6 lyngba ka SSR-2023, hynrei hadien ka jingkhmih bniah ia ka jingkam bad iaka jingpyrshah, kala don ka jingkiew haduh 49915 ngut bad kumba long mynta ki nongthep vote ha ka jylla baroh kawei ki long 21,61,129 ngut.
Na kitei ki 21,61,129 ngut ki shynrang ki don 10,68,801 ngut katba ki kynthei ki don 10,92,326 ngut bad 2 ngut ki Transgender bad nalor kane ki don ruh 3844 ngut ki Service Electors.
Ka jingpynrung kyrteng ia ki nongthep vote kynthei kala kot sha ka 10,92,326 ngut, kaba heh ban ia ka jingpynrung kyrteng ki shynrang.
Haba kheiñ kyllum lang kala don ka jingkiew kaba kot 2.36% ha ka Electoral Roll kaba mynta ban iaka Draft Roll kaba la pynmih ha ka 9.11.2022.
Ban don ka jingkhuid haka Electoral Roll kadei ka mat kaba hakhmat eh jongka ECI bad halor kane ka bynta kila don 13848 ngut ki nongthep vote kiba la shah weng noh ka kyrteng ka jongki naka Electoral Roll halor ka nongrim ba kila khlad noh, ka jingpynkynriah iaka jaka sah bad kumta ter ter.
Shuh shuh la pynbeit ruh ia ki kyrteng jong ki 40700 ngut ki nongthep vote ha katei ka thup kyrteng kaba thymmai.
La pyntreikam pura iaka SSR da kaba iaid katkum ki nongrim ban pynthikna ba kan don ka jingkhuid jingsuba bad kumta ter ter bad la pynlong ruh ia ki jingialang man la ka por ha ka da u CEO bad ki DC bad baroh ki seng saiñ pyrthei ban pynthikna ba kan don ka jingkhuid jingsuba ha ka jingpyniaid iaki kam ki jam jong ka SSR.
Ha ka thup kyrteng ki nongthep vote haka jylla ki don 7478 ngut ki briew kiba don jingduna ha ki dkhot met.
Haba ianujor bad ka thup kyrteng ha u snem 2018, kala don ka jingkiew ki nongthep vote haduh 18%, ha kaba 4,29,062 kidei ki nongthep vote kiba thymmai kiba la shim lang naduh u snem 2018.
Kumba long mynta, ka EP Ratio ka long 64.53%, Gender Ratio kadei 1022 bad ka jingthep kyrteng ki samla kiba haka rta 18-19 snem ka long 81,443 ngut.
Ha u snem 2018 ki don 3083 tylli ki Polling Station ha ka jylla hynrei mynta la pynkiew ia ka jingdon jong ki jaka thep vote sha ka 3482 tylli.
