Nongpoh, K’lyngkot 04 : U Myntri ka Tnad PHE bah Renikton L Tongkhar hynne ka sngi Balang, ula plie paidbah ia u mawnongrim ban pyntreikam ia ka Jal Jeeval Mission hapoh ka Nongpoh Greater Water Supply Scheme bala mang pisa palat T. 103.71 klur.
Kane ka skhim kan ai jingmyntoi ia palat 20 tylli ki shnong kiba hap hapoh ka Nongpoh Cencus Town.
Ha kane ka sngi la iadon ryngkat u MLA ka thain Bah Mayralborn Syiem, u MDC bah Balajied Rani, u Commissioner & Secretary ka Tnad PHEbSyed Md Andalaab Razi, bad kiwei kiwei ki heh ka Tnad PHE nalor ki riew pawkhmat ka Nongpoh.
Haba kren ha ka jingialang, u Myntri yla pynpaw ia ka jingkmen ban iadon bynta ha kane ka sngi sah jingkynmaw jong ki paidbah ka Nongpoh Census Town ban iohi ia ka jingurlong ka jingphohsniew ha kaban ioh ia ka umbam umdih hala iing lyngba ka skhim JJM.
“Nga da kmen shisha ban iadonlang ha kum kane ka sngi bad nga ai khublei ia ka jingtrei shitom ba khlem shong thait jong u MLA bad ki Ophisar ka Nongpoh ban pynurlong ia kane ka jingangnud bala palat 20 snem jong ki paidbah” ong u bah Renik haba bynrap ba ka jingpynlong ia kane ka project kaba seisoh, ka long kaba donkam ia ka jingiatreilang jong baroh ki Nongialam ki 20 Shnong bad ki nongialam ka thain.
Ula pyntip ruh ba ka Jylla Meghalaya dang shen kala ioh ia ka khusnam na ka Sorkar Pdeng halor ka jinglah pyntreikam bha ia ka skhim JJM hapoh ka Jylla kaba la ai jingmyntoi shikatdei eh ia ki nongshongshnong ka Jylla.
U Myntri ula kyrpad ia ka Sorkar Pdeng ban pyniar ia ka jingtreikam jong ka JJM ha ki jaka sor khnang ba kane ka skhim kan ai jingmyntoi ia baroh ki nongshongshnong jong ka Jylla.
