Shillong, Jan 4: Katba ki sngi kila jan ban long ka elekshon MLA haka jylla, ka seng saiñ pyrthei National People’s Party (NPP) kala nang khlain, ha kaba sa 3 ngut ki MLA kin pyniasoh noh ialade bad kane ka seng mynta ka taiew.
Ki 3 ngut ki MLA kiban pyniasoh noh bad ka NPP ki kynthup ia u Myntri Sorkar ka jylla u Bah Hamletson Dohling uba long ruh u MLA ka Mylliem, u MLA ka Umsning u Bah Jason Sawkmie Mawlong ha ka sngi Thohdieng mynta ka taiew.
Nalor kane u Myntri Sorkar barim ka jylla u Bah Samlin Malngiang uba long u MLA ka Sohiong yn pyniasoh noh bad ka NPP ha ka 10 tarik u Kyllalyngkot.
La khmih lynti ba u Bah Hamletson Dohling bad u Bah Jason S Mawlong kin iehnoh ia ka kam kum ki MLA ka jylla haka sngi Balang ha kaba kin leit ban aiti ia katei ka shithi ha u Lamphang ka ïingdorbar Thawaiñ ka jylla u Bah Metbah Lyngdoh.
U Bah Hamletson bad u Bah Jason kidei kiba la shah jied kum ki MLA na ka seng People Democratic Front (PDF) katba u Bah Samlin ula shah jied kum u MLA na ka seng Hill State People’s Party (HSPDP).
