Guwahati, Nohprah 28 :Ka National Student’s Union of India (NSUI) ka Assam ha ka 27 tarik mynta u bnai kala pynrem jur ia ka jingkynthoh u president ka BJP Assam u Bhavesh Kalita pyrshah ia ka party Congress.
Da kaba pynrem jur ia katei ka jingkren jong utei u president ka BJP, ka NSUI ka la ong ba u Bhavesh Kalita u la dei ban kiar na kiba kum kitei ki jingkynthoh ba tad dor bad kiba ktah mationg bad ia kiba ym lah satia ban pdiang.
Lah ban kdew ba u president ka BJP ka Assam u Bhavesh Kalita ha ka 26 tarik mynta u bnai ula ong ba u president u ban wan jong ka seng congress napoh Assam un dei u ksew.
Nalor kata ka NSUI kala dawa ruh na u Kalita ba u dei ban pan mab mardor hapoh ka 24 kynta namar ka jingpynmih ia kitei ki kyntien ba tad dor jong u.Ka NSUI kala ong ruh ba ka jingpynmih ia kiba kum kitei ki kyntien na u MLA uba mihkhmat ia ka constituency kaba la iaid shakhmat kum ka Rangiya ka pyni ia ka jinglong sahdien ka jong u.
Shuh shuh katei ka seng samla pule ka la maham ruh ban pynlong da ki jingiakhih ha ki district bapher bapher ka jylla lada u Kalita um pan mab halor katei ka jingkren ka jong u.
Kham hashwa, kata ha ka 2 tarik mynta u bnai, haba kren sha ka lad pathai khubor u nongialam ka AIUDF u Badruddin Ajmal u la ngat ha ka jingshah kynthoh kaba jur hadien ba ula ong ba ki Hindu ki dei ban bud ia ka nuksa jong ki Muslim ban pynithoh ia ki khynnah kynthei ha ka rta kaba 18 snem rta.
Watla katta, shi sngi hadien kane ka jingkren kaba la pynmih ia ki kynrum kynram, u Ajmal ula pan mab da kaba ong ba um don kano kano ka jingthmu ban pynsngewsih iano iano ruh.
