Shillong, Nohprah 23 : Ka Bharatiya Janata Party (BJP) hynne ka sngi thohdieng, kala kular ban ai sngewbha da ki kam pynroi ia ka Jylla ha kine ki san snem ban wan.
U President ka BJP Bah Ernest Mawrie ula pyntip ba ka BJP kala pynkhreh ia ka prokram ba 100 sngi ka ban don ia ka thup jong ki action plan kiba ka party kan pyntreikam ha kine ki 100 sngi hadien ba shimti ia ka jingsynshar. Ula ong baka Party ka kular kan ai ia ka jingshakri kabym lah thew satia ia kaba ki paidbah ka Jylla kin sa iohi ia ka jingtreikam ka party.
U Bah Ernest ula ong ba ha kine ki 50 snem, ki paidbah jong ka Jylla kila buh ia ka jingkyrmen ha ki Sorkar bapher bapher ban iarap ha kaban pynurlong ia ka jingphohsniew jong ki.
Ula ong ba ki paidbah na ka por sha ka por kila shu shah pynbiej da ki ktien jali jaum jong ki riewsain pyrthei ba shisien san snem hynrei mynta ki paidbah kila sngewthuh bad kim biej shuh.
“Ka Sorkar BJP ha Delhi bad ha kiba bun ki Jylla hapoh ka Ri kila ai ia ki kam pynroi hala ki jong ki jaka. Wat ka Jylla Assam kaba don marjan kala kiew sted bha hapoh ka jingialam jong ka BJP” ula ong haba bynrap ba ki paidbah mynta kila shaniah ha u Myntri Rangbah Duh Narendra Modi bad ia ka BJP.
Nalor kane, u Bah Ernest ula ong ba kino kino ki kam pynroi kiba iohi ha Meghalaya ha kine ki san snem ki dei kiba wan namar ki skhim jong ka Sorkar Pdeng marwei, kam pher la ka Sorkar Jylla ka pyrshang ban pynthame kumno kumno ruh.
Une u Nongialam ka BJP ula ai khublei Khristmas ia baroh ki Nongshongshnong ka Jylla Meghalaya.
