Rangjia, Nohprah 23 :Ki pulit ka Assam hynnin ka sngi kila ioh ban kurup 65 gram u suba drok heroin uba shongdor haduh kumba T. 70 lak napoh Rangia railway station.
Katkum ka khubor pulit la ong ba ha ka janmiet jong ka 22 tarik mynta u bnai hadien ba la ioh ia ka jingtip kaba bniah lyngba ki tnat syntiat ki bor pulit kila ioh ban kem noh ia u nongkhaii bad kurup ruh ia u suba droin heroin.
Une u briew uba la shah kynnoh donkti u dei uba la tip kyrteng kum u Mostafur Rahman 25 snem rta uba dei na ka shnong Bangaon kaba hap hapoh Rangia PS jong ka district Kamrup (R).Na une u briew ki pulit kila ioh ruh ban kurup ia ka pisa T.38,000 ha ryngkat artylli ki mobile phone.
Ha kawei pat ka bynta ia ka FIR la ujor hapoh Rangia police station na ka bynta ban pyniaid shakhmat ia ka jingtian bishar bad ka jingtohkit mynta ka dang iaid shakhmat.
Kham hashwa, kata ha ka 18 tarik mynta u bnai ki bor pulit kila ioh ban kurup haduh 6.2 lak tylli ki dawai kuli Yaba tablets napoh kawei ka kali ha Cachar district ka Assam.
Ka tyllong khubor ka iathuh ba ka kynhun ki pulit ki la ioh ruh ban kem noh ia laingut ki briew nalor kine ki dawai pynbuaid. Baroh kiba la shah kynnoh donkti ki dei ki nongshong shnong ka Meghalaya. Nalor kata haba khein kyllum une u drok u shongdor haduh kumba 175 klur ha ki ja ka iew beain ka pyrthei.
Shuh shuh ka tyllong khubor ka la ong ruh ba kane ka jingioh kurup drok ka dei napdeng ki jingioh kurup kaba heh tam mynta ka snem bad ka jingtohkit halor kane ka dang iaid shakhmat ban lap ia ka tyllong jong une u drok.
