Shillong, Nohprah 22 : U Myntri Rangbah ka Jylla Conrad K Sangma hynne ka sngi palei, ula pyntip ba ula dep iakren bad u Myntri Rangbah ka Assam Himata Biswa Sarma halor ka jingdonkam ban pynthikna ba ka jingshongsuk shongshngain ka dei ban don ha khappud.
U Conrad ula ong b aka jingjia ba dang shen ruh la dep ban iakren ha ka jingialang ba shiteng miet kaba la long ha nongbah Guwahati.
“Ngi la iakren halor ka jingdonkam ban shim ia ki sienjam ban pynthikna ba kum kine ki jingjia kim dei ban jia shuh hadien habud bad ba ka dei ban don ka jingtynkan na baroh arliang mamla bad kiwei kiwei ki jingdonkam khnang ban pynthikna ba kan don ka jingshongsuk ha ki shnong khappud” ula ong haba kren ha ka jingialang plie ia ka Ophis treikam ba thymmai ka Shillong Press Club.
U Myntri Rangbah ula ong ba kane ka long kaba donkam ban leh khnang ban lah pyntyllun shakhmat ia ka jingiakren pynbeit pud.
Ka jingiakren pud jong ka wat ba-ar hapdeng ka Assam bad ka Meghalaya kan sa sdang noh shen. Kine ki artylli kila dep ruh ban iasoi ia ka soskular Memorandum of Understanding (MoU) ha ka 29 Lber ban pynkut noh ia ka jingiakajia pud ha ki 6 tylli ki jaka napdeng ki 12 tylli.
