Jop u Nong Ethopia ia ka nam lahduh
Shillong Nohprah 21: Da ki spah ngut ki nongiamareh na kylleng ki jylla bad ri kila iashimbynta hynne ka sngi haka Sohra International Half Marathon kaba 21 Km bad ia ka nam lahduh ha kane ka jingiakob la ioh rah da u Adisu Bekele Abebe bad ka Richa Bhaduria haka Elite Category.
Ia kane ka Half Marathon la pynlong da ka tnad Sports & Youth Affairs jong ka jylla ryngkat ka jingiatreilang bad ka Meghalaya State Olympic Association (MSOA) bad kane ka jingiakob mareh kala sdang na shnong Laitsohpliah bad la pynkut pat ha Mawsmai.
U Commissioner and Secretary ka jylla u Sampat Kumar kum u kongsan ryngkat ka jingdonlang u heh ophisar sorkar u Vijat Kumar, u Director ka tnad Sports and Youth Affairs u S Awasthi bad ki nongialam jong ka MSOA kila sam ia ki khusnam sha ki nongjop kiba la jop ha katei ka jingiakob mareh.
Ha ka Elite Mens, u Adisu Bekele Abebe uba na Ethopia ula ioh rah iaka nam kaba nyngkong bad ioh iaka khusnam T.1.50,000 katba u Tirtha Pun (India) ula wan Baar bad ioh pdiang iaka T.1 Lak bad u Too Cheruiyot uba na Kenya ula wan balai bad ioh T.50,000, u Kemei Elijah Kipruto na Kenya ula wan ba saw bad ioh T.40,000 bad u K. Bikram Meitei (India) ula wan ba San bad ioh T.20,000.
Ha ka liang ki kynthei iaka nam lahduh la ioh da ka Richa Bhaduria (India), katba ka Christine Kambua Muyanga kaba na Kenya kala wan Baar, ka Arpita Saini (India) kala wan Balai, ka Kong Marqueenless Ramsiej (India) kala wan ba Saw bad ka Susan Chebet (India) kala wan basan bad kine kila ioh iaka song tyngka kaba kumjuh kumba ioh ki shynrang.
Ha ka Meghalaya PRC naka bynta ki shynrang ia ka nam lahduh la ioh da u Skhemlang Suba uba la ioh iaka takma ksiar bad ka pisa T.30,000, katba u Anil Guram ula ioh iaka takma Rupa bad ioh T.15,000 bad u Adhrishya ula ioh iaka takma Rnong bad ioh iaka khusnam T.10,000, katba haka liang ki kynthei ka Kyntimon Marwein kala long ka lahduh, ka Darishisha Iangjuh kala ioh iaka takma Rupa bad ka Daplin Wahlang kala ioh iaka takma Rnong.
Ha ka 10K Marathon ia ka nam laduh la ioh da u Bah Badonsing Tham uba la ioh iaka khusnam T.30,000 katba u Bah Pynshngainlang Dkhar ula wan Baar bad ioh iaka T.15,000 bad u Bah Kedrick Kharpor ula wan balai bad ioh T. 10.000.
Ha ka liang ki kynthei ia ka nam lahduh la ioh da ka Kong Bitaris Marbaniang, ka Kong Starina Jasain kala wan Baar bad ka Kong Smarles Marwein kala wan ba lai.
Nalor kane la sam ruh iaka khusnam sha ki nongjop haka jingiamareh kaba 5Km ia kaba la tip kum ka jingiamareh tang ban shu sngewtynnad.
