Shillong, Nohprah 21 : Ka Deputy Commissioner ka East Khasi Hills, hynne ka sngi Balang kala pynmih ia ka hukum ba la khang mynta ia baroh ki bos kamai kynthup naduh ki bos SPTS (bos saw) bad ruh ki bos shimet ba kin rung sha ki thain Police bazaar bad Motphran.
Kane ka jingkhang ia kine ki bos kamai ban rung sha kine ki jaka iew baheh duh ka Nongbah, kan treikam naduh ka 23 tarik mynta u bnai, ong ka hukum.
Ka Deputy Commissioner kala pyntip ba ia kane ka hukum la pynmih kat kum ka jingai jingmut jong ka Meghalaya Urban Development Authority (MUDA) bad ka Shillong Traffic ban lah pynduna ia ka jingdheng kali ha ki bynta jong ka Nongbah Shillong.
Ka Deputy Commissioner ka pyntip ba u Superintendent of Police (Traffic) un sa lum ia ka jingialang bad baroh ki nongpyniaid ia kine ki kali kamai (Operator/Association) bad ka MUDA ba kin pynshai halor ki lynti iaid kiba thymmai.
