Nongpoh Nohprah 20: Kum ka jingnang iai bteng ban iai pynkynmaw ia ki khun ki hajar ka pateng ba mynta ia la ka riti ka dustur, ka lehniam ka leh rukom, ka riam ka beit bad ka bam ka dih kaba dei ka spah tynrai ka thain Umden kaba la ioh ruh ia ka jingithuh kyrpang ha kaba ia dei bad ka jingpynmih ia u ksai ryndia, mynta ka sngi ba-ar, ka Nongtluh Eri Farmer Association ka la pynkhie biang ia ka tamasa Ri Kunai La Tynrai kaba saw ia kaba la pynlong ha ka shnong Umden.
La wan ban pynshngain ia kane ka tamasa kaba shisien shisnem, da u MLA ka Nongpoh Bah Mayralborn Syiem ha ka jingiadon ryngkat u Bah Balajied Rani MDC Nongpoh, u Father Glorius Syiemlieh, Parish Priest ka Umden Parish, ki Nongialam ka NEFA ba kynthup ia ka kong B.Mallai kum ka President jong ka NEFA, bad kiwei kiwei ki riew rangbah, ki longkmie longkpa lem bad ki khun samla jong katei ka thain.
Haba kren kum u kongsan, u Bah Mayral Born u la ai ka jingiaroh kaba khraw ia ki nongialam ka NEFA kiba la iohi jngai ia ka jingdonkam ban nang pynneh pynsah ia ki riti ki dustur, ki kolshor baroh kynthup naduh ka riam ka beit, ka bam ka dih bad kiwei kiwei khamtam ka kam thain jain ba ka pateng ba mynta kin tip, kin roi ki par ha kane ka spah tynrai kaba kum ka thain ka la don lypa.
“Ngi donkam ban ri ban sumar ia la ka jingithuh kaba kyrpang ba kum ki nongshong shnong hapoh ka dong ka thain Ri Bhoi District ngi la don lypa khnang ba ym tang ka pateng jong ngi kan tip ne ka lawei kan pynneh pynsah hynrei ba kiwei pat ki jaidbynriew kin tip kin shai bad kin tyngkai ruh ia ka jinglong kaba kyrpang ba kum ka jaidbynriew ka don”, ong u bah Mayral Born Syiem.
U la ai mynsiem ruh ia ki nongialam ka NEFA ba kin nang bteng ia ki kam jong ki ha kiba bun ki liang naduh ka kam shakri ban kyntiew ia ki longkmie thain jain, ban pynbit pynbiang ia ka ioh ka kot para longkmie bad ruh ban treishitom ha ka ban nang kyntiew ruh ia ki kam ba ki ju trei na kawei ka por sha kawei pat.
