Shillong, Nohprah 19 : U National President ka National People’s Party (NPP) bad Myntri Rangbah ka Jylla Conrad K Sangma hynne ka sngi nyngkong ula pynpaw ia ka jingsngewskhem ba ka party jong u kan ioh ia ka ‘single majority’ ha ka elekshon MLA-2023 ha Jylla.
U Conrad ula pynpaw ia kane ha ka jingialang pdiang sngewbha ia ka jingwan iasoh ki arngut ki MLA barim ka Congress-Kong Ampareen Lyngdoh (East Shillong) bad Bah Mohendro Rapsang (West Shillong) lem bad u MLA barim ka UDP bad MDC ka Narpuh Bah Emlangki Lamare.
Haba niew ia kane ka sngi kum ka sngi sah jingkynmaw ia ka party, u Conrad ula ong ba u da kmen palat ba ki Nongialam bala rangbah ha ka kam (senior) kila wan iasoh sha ka NPP. “Nga ju peit ia I Kong Ampareen haba I kren, Nga ju wat ia baroh ki Nongialam bad nga ju ong ba kine ki dei kita ki Nongialam kiba ngi donkam na ka bynta ka Jylla” ula ong.
U Myntri Rangbah ula ong ba ka jingwan iasoh jong kine ki Nongialam ka dei namar ba ki briew kila iohi ia ka jingkyrmen bad lehse ka lah ban ong ba kan sa don ka seng sain pyrtheika ban ioh biang ia ka single majority ha ka Iingdorbar Thaw Ain hadien 50 snem ka jingioh iala ka jong ka Jylla ba pura.
“Ka long kaba lah bad ka dei namar kane ka lad, kala wanrah lang ia ngi iwei pa iwei ha kane ka jaka” ula bynrap.
U Conrad ula ong ba ka Sorkar Meghalaya Democratic Alliance hapoh ka jingialam jong ka NPP kala lah ban pynbeit ia kiba bun ki kam kibym shym la lah ban leh ha ki por bala leit noh.
Ula ong ba kane ka Sorkar ba ialam ka NPP kala shimkhia ia ka kam kajia khappud. Kam dei ka kam kaba suk bad kino kino ki nongialam sain pyrthei kin ong ha phi ba ka kam ba khadduh ba ki kwah ban ktah ka dei ka kam iakajia khappud.
“Hynrei ngi la buh ha ka manifesto jong ngi (mat treikam) ba ngin trei naka bynta ban pynbeit ia ka jingiakajia pud bad nga kmen ban iathuh ha phi bad phi la iatip lut ruh ba ngi la iaid ha ka lynti kaba biang eh ha ka sien ba nyngkong. Kam dei kaba suk, kam dei kaba biang pura, kan ym long ruh kumta hynrei ka dei kaba biang palat ban jam shakhmat bad ka dei ia kaba hap ban leh” ong u Sangma haba bynrap “50tylli ki snem kila iaid, ngim lah ban bteng ha kaban nym don ia u pud u sam ba thikna jong ka Jylla. 50 tylli ki snem kila leit bad ngim lah ban shah ba ki paidbah ha khappud kin nang iai mad ia ki jingeh”.
Ula kular ruh ba ki kam bala sahteng ha kine ki 50 snem ki dei kiba lah ban pynbeit lada “Ngi iatreilang kum ka kynhun”.
Une u Khliehduh ka NPP ula kyntu ia ki paidbah ka Nongbah Shillong ba ka por kala dep ba sa shisien ban wanrah biang ia ka burom jong ka Shillong. “To ngin pynlong ia ka Shillong kum kawei na ki Nongbah ba biang eh hapoh ka Ri bad kane kan urlong lada ngi iatylli bad iatreilang bad nga tip ba kan sa urlong shisha”.
Haba pynpaw ba ka Sorkar MDA kala mad ia kiba bun ki jingtynjuh ha kine ki san snem bala leit, u Conrad ula ong “Ki jingtynjuh ki bym lah niew shuh kila wan bad katto katne ki dei kiba ka pyrthei kam pat ju iohi mynno mynno ruh hynrei ngi la jam shakhmat namar ngi don da ka thong ha ka jingmut jingpyrkhat jong ngi”.
Haba kdew ia ki jingjop ha ka jingtreikam jong ka Sorkar, u Conrad ula ong ba ha kine ki san snem, ka jingshna ia ki surok lada khein da ki kilometer kala tam shaba palat haba nujor bad ka jingshna surok ha kine ki 20 snem bala leit noh.
“Ngi la lah ban ai shibun ki skhim sam um sha kylleng ki jaka jong ka Jylla haba ianujor bad ki 50 snem ba ioh iala ka jong ka Jylla. Ngi la lah ruh ban iada ia kiba bun ki jingim jong ki Longkmie bad ki Khunlung khynnah” ula ong.
Ula bteng “Ha kine ki arsnem shiteng, ka GDP jong ka Jylla kala tam ia ka 8%, kaba heh duh bad kaba heh ban ia kiwei ki Jylla hapoh ka Ri. Ha kine ki 10 snem bala leit, ka GDP kala duna bha hynrei kane ka dei namar ba ha ki san snem bala leit (2011-2016 ) ngi don satia ia ka roi ka par hynrei hadien kane ngi la kynjoh sha ka 8.5% ka jingkiew ha ka GDP bad kane ka dei ka kam kaba ngi trei mynta. Ha ka jingpynlut ka Sorkar ruh, ngi la kiew n aka T.9000 klur sha ka T.18000 klur ha ka mang tyngka ba shisnem, kaba long arshah ia ka jingpynlut kaba la buh ha ka mang tyngka. Namar kata ka daw ngi la iohi ia ki jingkylla ba ngi iohi mynta. Ngam ong ba ngi la leh lut ia baroh, ki dang don shibun ki kam ba hap ban leh hynrei dei hangne ba ngi hap ban wan iatreilang”.
U Symbud Myntri Rangbah ka Jylla Bah Prestone Tynsong ula on gba kine ki arngut ki MLA barim kin long ki nongialam ha ka nongbah Shillong ban ioh khur jingjop na baroh ki constituency bad ban pynthikna ba ka NPP kan ioh ia ka jingjop.
“Ka Party kaba la ioh ia ka obsolute majority ha ka histori ka Meghalaya ka dei ka AHPLC ha u snemm 1972 bad hangne kala ioh haduh 32 ngut ki MLA n aka 60 ngut. Ngi la dep kynnoh 50 snem bad nga tharai ngin sa thaw record biang ba ngi dei ban ioh ia ka majority ha ka kyrteng jong ka NPP. To ngin ia kyrtiang dien bad ia pynkhein ia ka record mynta lada long kumno kumno ruh” ula ong.
Ha ka jingkren, I Kong Ampareen ila pynpaw ia ka jingsngewskhem ba in lah ban shakri khambha ia ki paidbah da kaba iasoh bad ka NPP. Ila kular ruh ban ieng ha syndak u Symbud Myntri Rangbah bad ong “Ngi phai sha phi. Ki paidbah ka 16 East Shillong kan nym pynlehrain ia phi. Ngi iatip bha ia kaei kaba phi lah ban leh”.
Ila ong ruh ba ka NPP kala donbok palat ban don ia ki hehspah kum u ma Sniawbhalang Dhar.
“Ka Jylla ka donkam ia ki nongialam ki ban ym tuh ia ka pisa….katto katne ki briew ki pynlong ishu ia ki kyrtong kiba riewspah hynrei nga ong ha phi….nga jied bna iatreilang bad ki kyrtong ki ban nym jah rngai bad ka song pisa u paidbah ne ka hok u paidbah” ila ong.
U Bah Mohendro ula pynpaw ia ka jingsngewskhem ba un sa jop biang kum u MLA ha u 2023 namar ki paidbah ki dang kyrshan tylli ia u.
