Shillong, Nohprah 17: Ka National People’s Party (NPP) Youth Wings Mylliem Constituency, hynne ka sngi saitjain kala pynkup burom iaki samla ka thain, kiba wan shakhmat haki jingpule bad ki jingialehkai bapher bapher.
Ka NPP Youth Wing ka la pynkupburom ia kine ki samla pule daka ‘6th U Tirot Sing Syiem Academic Award 2022’ bad la sam ia ki khusnam da u Myntri ka that CRD Block bah Hamletson Dohling u badei ruh u MLA ka thain haka jingdon lang ka Prof. Dr. Badaplin War, Fr. Tobias Kharngapkynta, ki nongialam ka NPYF bad ki Rangbah Shnong ka thain bad ki paidbah ka thain.
Kiba shah pynkuburom ha kane ka sngi ki kynthup 81 ngut ki samla ba pyndep iaka Class X, 48 ngut ki samla ba pyndep iaka Class XII bad 6 ngut kiba wan shakhmat haki jingialehkai bapher bapher bad 2 ngut kiba ioh kyrdan top 20 ha ki eksamin.
Haba kren ha kane ka sngi u bah Hamletson Dohling u la ong ba naduh ba u dang dei u dkhot ka Khasi Student Union (KSU) u don beit ka jinghthrang ban pynshlur iaki samla ka jylla ne ki samla ka konstitwensi daka sam iaki khusnam la kadei ha ka liang ka pule puthi ne ka liang jingialehkai bad hadien ba u la long nongmihkhmat paidbah u la bteng biang ban sam khusnam ban pynshlur iaki samla ka thain Mylliem.
U bah Hamlet u la ong ba kane ka jingai khusnam iaki khynnah bad samla pule ka thain kan nang pynshlur iaki bad kumjuh ruh kan ai mynsiem ia kiwei kiba khlem shah pynkupburom ban nang trei shitom naka bynta ban ioh kheit ia u soh ba thiang.
“Kane ka jingsam khusnam kam kut tang ba long MLA ne myntri sorkar hynei kan dang iai bteng namar kum kine ki jingpynkupburom kin ai mynsiem ia kiwei ki khynnah bad samla pule ban trei shitom ban poi shaka jingjop” la ong u bah Hamlet.
U bah Hamlet u la ong ruh ba ka jingai kyrteng ‘U Tirot Sing Syiem Academic Award’ kadei ruh kum shi bynta ban pynsah nam ia u riew khraw ka jylla Meghalaya u ba la len ialade naka bynta ban ioh ka jinglaitluid naka sorkar phareng.
U la ong ba ki samla ka thain Mylliem konstitwensi bad ka jylla Meghalaya kidei ban bud nuksa iaki dienjat u Tirot Sing Syiem kata ban trei shitom bad ban nym sangeh lada wan kino kino ki jingeh naka bynta ban ioh iaka jingjop bad ban poi shaka thong.
