Shillong, Nohprah 17: Ki Kynhun Sengbhalang kila pynpaw ia ka jingkwah ban iakynduh ia u Myntri Rangbah Duh ka Ri u Narendra Modi, u ban wan iuhkjat ha Jylla lashai ka 18 tarik u Nohprah.
Kine ki Sengbhalang ki kynthup ia ka Khasi Students’ Union (KSU), Federation of Khasi Jaintia and Garo People (FKJGP), Hynniewtrep National Youth Front (HNYF), Jaintia Students’ Union (JSU), Ri-Bhoi Youth Federation (RBYF), Garo Students’ Union (GSU), Achik Youth Welfare Organization (AYWO) bad ka Association for Democracy and Empowerment (ADE).
Ki nongialam jong kine ki 8 tylli ki sengbhalang ki pynpaw ia ka jingkwah ban iakynduh ia u Myntri Rangbahduh ka ri ha nongbah Shillong ban wad jingtip markhmat na u Myntri Rangbahduh haba iadei bad ka jingdawa pyntreikam iaka Inner Line Permit (ILP) hapoh Meghalaya bad ban pynrung noh iaka ktien Khasi bad Garo hapoh ka khyrnit ba phra ka riti synshar ka ri India.
Naka liang u president ka KSU u bah Lambokstarwell Marngar u la ong ba ka seng lem bad kiwei ki sengbhalang ki kwah ba ka sorkar Meghalaya kan ialeh katba lah ban lum ka jingialang jong ki sengbhalang bad u Myntri Rangbahduh ka India ha nongbah Shillong naka bynta ban iakren halor ki mat ba kongsan jong ka jylla.
U bah Lambok u la iathuh ba haduh mynta naka liang ka sorkar jylla kam pat phah ktien la kan don ne em ka jingialang hapdeng ki sengbhalang bad u Myntri Rangbahduh ka ri India hynrei naka liang ka seng kam kwah shuh ban kynduh ia u Myntri ka tnat kam pohïng namar kila dep ban kynduh la bunsien bad kam shym la don satia kano kano ka jingseisoh kaba la mih.
“Ngi kyrpad iaka sorkar jylla ba kan pyniakynduh iaki nongialam sengbhalang bad u Myntri Rangbahduh ka ri India ban ioh iakren markhmat bad u haba iadei bad ka jingdawa ILP bad ban pynrung noh ioh iaka ktien Khasi bad Garo hapoh ka khyrnit ba phra ka riti synshar ka ri India” la ong u bah Lambok.
