Tawang, Nohprah 17 :Ki nongshong shnong ka Tawang hapoh Arunachal Pradesh kila pynpaw ka jingsngew skhem ha ki bor shipai ka India bad pynpaw ruh ka jingkyrshan ka jong ki hadien ka jingiakynad kaba la jia ha ka 9 tarik mynta u bnai, kata hadien ba ki shipai India kila lah ban khanglad ia ka jingwan tur jong ki shipai China sha ki bynta khappud jong u LAC ha Yangste sector hapoh Tawang.
Na ka liang ki trai shnong kila ong ba ka jinglong jingman ha kane ka thain khappud mynta ka la jai jai hadien katei ka jingiakynad. “Ka jinglong jingman ha Tawang mynta kala iaid beit iaid ryntih.Ngi la iohsngew ba kala don ka jingiakynad hapdeng ki bor shipai ka India bad ka China hynrei ngim don kano kano ka jingeh hangne namar ka jingdon ki bor shipai ka India ha ki bynta khappud,” ong u Nima Sarang uwei na ki trai shnong.Nalor kata ula ong ruh ba na ka liang ka sorkar ka la leh ia ki kam pynroi ha katei ka jaka bad ba na ka liang ka jong ki ruh kin dang iai bteng ban ai ka jingkyrshan kaba pura ia ki bor shipai jong ka ri.
“Ngi sngew sarong ban long ki nong India.Ki nongshong shnong ka Tawang ki don hapdeng ka jingshngain namar ka jingdon ki shipai India.Ngi ioh jingtip halor ki jingiakynad ha ki thain khappud tang lyngba ki lad pathai khubor bad ki tv channel,” ong u Lobsom Tenja uwei pat u nongshong shnong ka thain. “Ngin jin da la sngew donbok shibun lada ngin ioh ia ka lad ban shakri na ka bynta ka ri bad na ka bynta ki shipai India,” ula ong shuh shuh.
Na ka liang u Myntri Iada ri u Rajnath Singh ha ka sngi ba Ar ba la lah ula ai ka jingpynshai hapoh Lok Sabha ha kaba iadei bad katei ka jingiakynad bad ong ruh ba ka China kala iai bteng ban pyrshang pynkylla ia ka status quo hapoh Arunachal, hynrei na ka liang ki shipai India kila pynbor ia ki ba kin randien sha shiliang khappud. “Kam shym la don kano kano ka jingiap ne ka jingmynsaw jur sha ki bor shipai ki jong ngi.Nalor kata la kyntu ruh ia ki shipai ka China ba kin kiar na kiba kum kine ki jingpyrshang bad ban pynneh ia ka shongsuk shongsain ha ki jaka khappud,” ong u Rajnath Singh.
Ki bor shipai ka India bad ka China kila poi sha ka jingialeh markylliang ha ki bynta jong ka Tawang sector ka Arunachal Pradesh ha kane ka taiew ba la lah, kata ka jingjia jong ka jingialeh markylliang kaba nyngkong hapdeng kine ki ri ba marjan naduh ka jingiakynad kaba shyrkhei kaba la jia ha Galwan vallye kaba la jia ha u bnai Jylliew 2020. Ha katei ka jingjia kaba dang shen hynriew ngut ki shipai India kila ngat ha ki jingmynsaw ia kiba la pynkynriah noh shapoh ka hospital shipai ha Guwahati.
