Agartala, Nohprah 16: U Myntri Rangbahduh (PM) Narendra Modi un pynlong ka jingleit jngoh ia ka Tripura ha ka 18 tarik mynta u bnai, pyntip u Myntri Rangbah (CM) ka jylla u Manik Saha.
Haba kren sha ki lad pathai khubor ha Agartala, u Saha ula ong; “U PM Modi un pynlong ka jingwan jngoh sha kane ka jylla ha ka 18 tarik mynta u bnai ha ka por kumba 2:30 nohphai sngi.U PM un plie ruh ia kiba bun tylli ki skhim kam pynroi, un iakynduh ruh ia ki MLA bad pyniasoh ha ka jingialang jong ka BJP state core committee.
Na ka liang u Myntri ka tnat pathai khubor ka Tripura u Sushanta Chowdhury ula ong ba u PM Modi un ai ruh ia ka jingkren ha ka jingialang paidbah ha madan Swami Vivekananda ground hadien ba ula wan poi hapoh Maharaja Bir Bikram (MBB) airport.
Nalor kata u Modi un pynlong ruh ka jingiamir jingmut bad kito ki nong ioh jingmyntoi lyngba ki welfare scheme bapher bapher kumjuh ruh bad ki MLA bad ki myntri sorkar, ong u Chowdhury.
Kane ka jingwan jngoh jong u PM Modi kala wan long ruh ha ka por ba ka sorkar jylla kala shim ia ki sienjam ban pynpaw ia ki jingtreikam jong ka sorkar hakhmat ki tyngkong iing lyngba ka portal ba la tip kum ka ‘Amar Sarkar’ (My government) na ka bynta ban pynurlong ia ka Localised Sustainable Development Goals (LSDG).
Kane ka sienjam ‘Amar Sarkar’ ka dei ka sienjam ha kaba ki paidbah khamtam ha ki thain nongkyndong ki lah ban pynpaw ia ki jingeh ki jong ki bad ban shim ia ki sienjam kiba donkam.
