Shillong, Nohprah 15 : U President ka BJP-Meghalaya bah Ernest Mawrie ula ong ba ka Party ka dang ap ia ka rai jong ki Nongialam na Delhi halor ka jingkam jong u ba dang shen ba ka BJP kan sa mih noh na ka Sorkar MDA hadien ba ki nongialam na Jylla kila iakynduh ia ki Nongialam na Delhi.
“Ia kane ka kam la ieh mynta ha ki Nongialam na Delhi bad ka dei ka rai jong ki mynta” ong u Bah Mawrie ha ka jingiakynduh bad ki lad pathai khubor hynne ka sngi palei.
U Bah Ernest ula pyntip ba kane ka kam ka dei ka mat ba ju iakren ha kiba bun ki jingialang bad ki Nongialam na Delhi ha ka jingiadonlang u Myntri Rangbah Duh ka Ri u Narendra Modi, kaba la long ha ka 6 bad 7 tarik Nohprah. Ula pyntip ruh ba dang shen kala don ka jingialang ba iakren ia kane ka kam bad u Myntri kam Pohiing u Amit Shah lem bad u National President JP Nanda bad kiwei kiwie ki nongialam.
Haba kylli ba kam la slem palat ban weng ia ka jingkyrshan, u Bah Ernest ula kyntait ban kynthoh da kaba ong ba ka rai ka shong ha ki Nongialam na Delhi.
Lah ban kdew ba ka BJP ha Meghalaya kala byrngem ban weng noh na ka Sorkar MDA naduh ka 4 tarik Nailur ha kaba u National Vice President ka BJP bad uba khmih iaka Meghalaya M Chuba Ao, ula pyntip b aka BJP ka lah ban weng noh ia ka jingkyrshan na ka Sorkar MDA ba ialam da ka NPP hapoh une u bnai ba mynta.
