Nongpoh, Nohprah 15: U Symbud Myntri Rangbah ka Jylla Bah Prestone Tynsong hynne ka sngi palei, u la kren shai ba ki 22 tylli ki shnong kiba hap hapoh ka Block II, Raid Nongtung ki dei kiba hap shapoh ka jylla Assam bad ka sorkar MDA ka la dep ban aiti ia ki kot ki sla ha kane ka jingiakren pynbeit pud khnang ba kine ki 22 tylli ki shnong kin wanphai biang sha u pud u sam ka Meghalaya.
Ia kane u la kren haba jubab ia ka jingkylli jong ki nongthoh khubor halor ki jingnang iai pynibor ki bor pulit Assam ha ki khappud ka Block II ha Ri Bhoi District.
“Ki paidbah ki dei ban sngewthuh shai ba kine ki 22 tylli ki shnong ki dei kiba dang hap ha Assam bad namar ka jingdon jong ki paidbah nongshong shnong kiba dei ki trai ri trai muluk na ka jylla Meghalaya, ka sorkar MDA kan iakhun beit triang ban pynioh biang ia kine ki shnong sha u pud u sam ka jylla Meghalaya” ula ong.
Halor ka jingwan pynibor ki pulit Assam ha ki khappud ka jylla Meghalaya khamtam ha Ri Bhoi District, u Bah Prestone Tynsong u la ong, ba ha ka jingpynbeit pud ka wat ba nyngkong, na ka liang ki ar sorkar jylla Meghalaya bad Assam ki la ioh ia ka jingbthah na u Myntri ka tnad pohiing ka sorkar pdeng u Amit Shah, ba kine baroh ar jylla kim dei ban pynthut ia kino kino ki kam pynroi ha ki thain khappud bad ban nym pynwit ruh ia ka shongsuk shongshngain ki paidbah ha ki shnong khappud.
“Ka ain ka don ban peit ia kane ka jingleh jong ka Sorkar Assam” ula ong hynrei ban shongshngain ki paidbah, ka sorkar jylla ka la rai ban buh ia ki ktem pahara kiba khlain kiba la tip kum ki Border Outpost (BOP) ha kito ki shnong kiba donkam ia ki jingpahara bad la bthah ia ki bor pyniaid district ka Ri Bhoi District bad kiwei kiwei ki district ha ryngkat bad ka ki Superintendent of Police ban ia pynbeit bad ki nongialam shnong ban pynioh ia ki jaka ban buh ia kine ki BOP.
Halor ki kynrum kynram ba la mih ha kine ki sngi ha ki thain khappud, ka sorkar jylla ka la bthah ia ki Deputy Commissioner ban pynbeit noh mardor ia kine ki kam baroh bad ki bor district ka Assam khnang ba yn lah wanrah ia ka jingshongshngain ha ki shnong khappud ka jylla Meghalaya.
