Shillong, Nohprah 14 : Ka Federation of Khasi Jaintia & Garo People (FKJGP) kala dawa ia ka Sorkar Jylla ban ai ka jingiada ba mardor ia ki nongshongshnong ka Umsaw-Lumdorbar, Block-II namar ka jingwan pynibor jong ki Pulit Assam.
Kane ka jingdawa kala mih hadien ba ki Pulit ka Assam kila thwet ia ki Nongialam Shnong jong kane ka shnong Khappud halor ka jingkynnoh ba ki donkti ban pynpra ia ki jingker sainar ha ka jaka jong ka tnad Forest ha kane ka shnong.
“Ka FKJGP ka dawa ban ai jingiada mardor ia ki Nongialam Shnong bad ki nongshongshnong ka Umsaw Lumdorbar ban lait na ki jingjia kumba jia ha Mukroh” ong u Senior Vice President ka FKJGP Bah Elton C Warjri.
Ula ong ba kat kum ki jingtip bala iohlum, ka Tnad Forest ka Assam kala wan kyntur pud jubor ha kane ka Shnong bad kane ka dei ka kam kaba beain namar ka Lumdorbar ka dei ka shnong ba dang hap ha Meghalaya.
Ka Seng ka pynrem jur ia ka jingthwet jong ki Pulit ka Assam ia ki Nongialam Shnong haba dawa ia ka Sorkar Jylla ba kan pynsted noh shaid shaid ha ka jingiakren pynbeit pud bad ka Assam.
