Agartala, Nohprah 13 :Haduh palat 20 ngut ki briew kiba la pynlong ka jingiakhih halor ka kam hikai skul kum ki nonghikai kiba la pyndep ia ka graduate kila ngat ha ki jingmynsaw hadien ba ki pulit kila bom la tied ia ki ha ka por ba kila pynlong ia ka jingiakhih kaba jai jai hakhmat ka iingsah u Myntri ka tnat pule puthi ka Tripura u Ratan Lal Nath ha ka 12 tarik mynta u bnai.
Haba kren ha kaba iadei bad kane ka phang, uwei na ki nongiakhih pyrshah ula ong ba kila ialum lang ha kane ka jaka na ka bynta ban iakynduh ia u Myntri ka tnat pule puthi namar kham hashwa ula kular ba un pynurlong ia ki jingdawa ki jong ki hynrei ia kaba um pat shym la leh ei ei kat haduh mynta.
‘Ka long da shisha kaba sngew bynniaw shibun ba khlem kano kano ka jingiakynduh une u Myntri ula mih noh na la iing nakhmat jong ngi.Kham hadien ki bor pulit, kynthup ia ki bor pahara TSR bad CRPF kila banbor ia ngi da kaba bom lathi watla ka jingiakhih ka jong ngi ka long da ka lynti kaba jai jai,” ula ong.
Katkum u Bhowmik la ong ba kila don haduh kumba 50 ngut ki nongiakhih kam hikai kiba la ngat ha ki jingmynsaw bad laingut kiwei pat kila don hapdeng ka jingshah sumar hapoh ka hospital.Nalor kata ula kynnoh ruh ba kawei ka longkmie armet ruh kala shah bom shah tied ha ki heh pulit kiba dei ki rangbah.
Ha kawei pat ka bynta, ki nongialam sain hima na ka PIM, Congress, Trinamool bad ka Tipra Motha kila her mardor shapoh IGM hospital ha Agartala na ka bynta ban wan peit ia kito ki nonghikai kiba la shah pynmynsaw.
Haba kren halor kane ka mat, u state secretary ka CPIM u Jitendra Chowdhury ula ong, “Man ka sngi ngi iohi ia ki samla ka jylla kiba la nang la stad bad kiba la pyndep ia ki selection test na ka bynta ki kam ki jam kila iaid sharum shaneng na kab ynta ban wad kam wad jam.Ki myntri kila kiar ban iakynduh bad ki briew kiba angnud ban ioh kam ioh jam hadien ba kila wan ieng hakhmat iing jong ki, katba ha ka jingialang bad ki lad pathai khubor kala don ka jingduna jong ki nong aplai kam kiba la tbit na ka bynta ki kam bapher bapher hapoh ki tnat sorkar.”
Nalor kata ula shim ruh ia kane ka jingleh jong ka sorkar kum ka bym iahap ha ka longbriew manbriew bad kam ruh ba mynta lah san snem kynthih ka sorkar jylla kala ialehkai bad lehbor pyrshah ia ki samla ka jylla ha kiba bun rukom.
Kumjuh na ka liang u incharge ka Trinamool Congress u Rajib Banerjee ruh ula pynrem jur halor katei ka jingpyndonkam bor jong ki pulit.
U MLA barim uba dei ruh u nongialam ka seng Congress u Asish Kumar Saha ruh ula pynrem jur halor katei ka jingjia bad ong ba kane ka jingjia ka pyni shai kdar ia ka jinglong jong ka sorkar BJP pyrshah ia ki nongwad kam wad jam kiba la nang la stad.
