Guwahati, Nohprah 13: Ia ki hynriew ngut ki shipai India kiba la ngat ha ka jingmynsaw na ka jingiakynad bad ki shipai People’s Liberation Army ka China kaba la jia ha ka 9 tarik mynta u bnai ha Arunachal Pradesh la pynkynriah noh shapoh ka 151 base hospital ha Basistha, Guwahati.
Katkum ki khubor la iathuh ba ia kine ki shipai India kiba la mynsaw la pynkynriah noh da ka liengsuin na Tawang ha ka janmiet jong ka 9 tarik mynta u bnai sha ka nongbah Guwahati na ka bynta ban aijingsumar.
Ki shipai ka India bad China kila poi sha ka jingiakynad ha ki bynta khappud jong u Line of Actual Control (LAC) ha ki bynta jong ka Tawang Sector kaba hap hapoh Arunachal Pradesh ha ka 9 tarik mynta u bnai.Katkum ki khubor la iathuh ba ha kane ka jingiakynad kala don ka jingmynsaw sha baroh arliang.
Katkum ki tyllong khubor heh sorkar, la ong ba ha ki katto katne ki bynta jong u Line of Actual Control (LAC) ha Tawang Sector, Arunachal Pradesh ki don ki jaka kiba wanrah ka jingiasngewthuh bakla ha kaba baroh arliang kila iaid pahara ha katei ka jaka haduh ki bynta kiba kila kam trai.Kane ka jinglong jingman ka dei kaba la jia naduh ki snem 2006.
Ha ka 9 tarik mynta u bnai ki shipai PLA ka China kila pyntip sha LAC ha Tawang Sector kaba la kam trai ha kaba kala mih ka jingialeh markylliang bad ki shipai India bad wanrah ka jingmynsaw ba malu mala sha baroh arliang.
Hadien kane mardor ki bor shipai na baroh arliang kila randien noh.Hadien kane na ka liang ki nongialam shipai kila pynlong ruh ia ka Flag meeting ban iamir jingmut halor ka mat kaba dei ban bud beit ryntih bad ban pynneh pat ia ka shongsuk shongsain.
Kane ka dei ka jingiakynad kaba nyngkong hapdeng ki shipai ka India bad China hadien ka jingiakynad kaba la jia hapoh ka thain mihngi ka Ladakh.
Kawei na ki jingjia kaba kham jur ka dei kaba la jia ha Galwan Valley ha u bnai Jylliew 2020, hadien ba 20 ngut ki shipai ka India kila aiti la ka jingim bad palat 40 ngut ki shipai ka China ruh kila shah pyniap lane shah pynmynsaw.
