Shillong, Nohprah 12 : Ka Rajiv Gandhi Indian Institute of Management (IIM), Shillong kala iasoi ia ka soskular Memorandum of Understanding (MOU) bad ka Clark University na USA, ban kyntiew ia ka Student Exchange Programme ( jingialeit iawan jong ki samla pule ban ioh ia ki jinghikai) hapdeng kine ki artylli ki University.
Kane ka MoU ka kynthup ruh ia ka kam wad bniah kiba iadei bad ki pule dangle (Academic research), ki nonghikai (faculty) bad ki Nongtrei (Professional staff member) hapdeng kine ki artylli ki jaka pule.
U Dr Alan Eisner, Dean bad Professor ka School of Management, Clark University bad u Jayantanuj Das, Graduate Admission Counsellor, Clark United, kila wan sha IIM Shillong ban iasoi ia ka MoU.
U prof DP Goyal ula ong “Ka jingiatreilang hapdeng ka IIM Shillong bad ka Clark University, USA kan plie lynti ia ki samla pule ka IIM Shillong ban ioh leh ia ki jingwad bniah (research) shabar ka Ri bad kumjuh ruh ka lad pule nalor ka jingiohkam iohjam shabar ka Ri”.
“Kane kan iarap ruh ban kyntiew ia ka kyrteng jong ka IIM Shillong ha ki iew ka pyrthei, ka ai mynsiem ia ki samla pule ka IIM Shullong bad kan khring ia bun ki kompani nabar ri ba kin thungkam ia ki samla ba pass na IIM Shillong” ula ong.
Kat kum ka jingong jong u, kane ka jingiatreilang ka don da ka thong bad kata ka long ban ailad ia ki nongshim bynta bad ki jingtip ba ki donkam ban tip khnang ba kin lah ban pyndonkam ha ki jingpule jong ki, ka ban hikai ruh ia kum kumno ban sdang, pyniaid bad pynheh ia ki kam ba ki seng ha kane ka pyrthei.
Kane ka MoU bad kiwei pat kiba la iasoi haduh mynta, kin ailad ruh ia ki nonghikai bad ki samla pule ha IIM Shillong ba kin nang iohlad ban mih shabar ka Ri bad ban trei ne pule ha ki jaka pule ba paw jong ka pyrthei.
