Shillong, Nohprah 12: Ka Chairperson jong ka seng sain pyrthei All India Trinamool Congress ka Mamata Banerjee ha ka sien kaba nyngkong eh kala wan iuhkjat hynne ka sngi nyngkong ha nongbah Shillong ban pynkhlain ia kane ka seng sain pyrthei hapoh ka Jylla.
Ia kane ka Khliehduh jong ka AITC la pdiang sngewbha da ki nongialam bad ki nongkyrshan ka AITC ba kynthup ia u Nongialam ka Liang Pyrshah Dr Mukul Sangma, u President Bah Charles Pyngrope bad kiwei kiwei.
Ia ka Mamata ryngkat bad u General Secretary ka AITC u Abhshek Banerjee la pdiang burom da ki Nongialam bad ki MLA ka AITC ha Shillong Airport ha kaba ki paidbah bad ki nongkyrshan na kylleng ki jaka kila wan ban pdiang sngewbha ia kane ka nongialam kaba la wan ha ka sien kaba nyngkong ha ka jylla.
Katkum ki jingtip bala iohlum la iathuh ba ka Mamata ryngkat bad u Abhishek Banerjee kin iakynduh iaki MLA bad ki kyrtong kiban iakhun iaka elekshon MLA 2023 bad ban iatai ruh halor ka jingpynkhreh iaka elekshon ha kylleng ki Constituency jong ka jylla Meghalaya khnang ban pynthikna ba ki kyrtong ka AITC kin jop bun ngut ban ioh ialam iaka sorkar ha u snem ban wan.
Ka Mamata Banerjee kan iakynduh ia ki nongialam bad nongkitkam ka seng ha ka jingialang kaban long ha ka State Convention Centre haka 13 tarik bad ha kane ka sngi kan iashimbynta ruh haka jingrakhe iaka jinglehkmen Christmas ha Windermere Resort, Umpling.
