Guwahati, Nohprah 12 :Uwei u runar pyniap briew (Contract killer) napoh Bihar ula shah siat iap ha ka jingiather kuli bad ki pulit ha Lumding, Assam hadien ba ula pyrshang ban phet krad na ki bor pulit hadien ba ula shah kem.
Katkum ki khubor la ong ba une u runar ba la tip kyrteng kum u Mohan Kumar ula shah kem noh ha ki bor pulit ka Assam ha ka miet jong ka 11 tarik mynta u bnai na Lumding.Lah ban kdew ba une u runar ula pyrshang ban phet krad hadien ba ula shah kem noh ha ki bor pulit halor ka jingdonkti ha ka kam pyniap briew.
Katkum ki khubor la ong ba u Kumar ula shah kem noh halor ka jingkynnoh donkti ha kaba pyniap ia uwei u nongtrei ka tant railway uba kyrteng u Tarun Chakraborty.
Kane ka jingjia kala wan jia hadien ba u Mohan Kumar ula shah ialam sha ka jaka ba la jia ka kam pyniap ha kaba ula buhrieh noh ruh ia ka tiar siat, kata hadien ba ula pyrshang ban phet krad noh na kti jong ki pulit.
La ong ruh ba u Kumar hadien ba ula wan poi ha katei ka jaka ba la jia ka kam pyniap ula shim ia katei ka suloi kaba ula buhrieh bad pyrshang ban phet krad hadien ba kala mih ka jingiather kuli markylliang hapdeng une u runar bad ki bot pulit ka Lumding.
Watla ia u Mohan Kumar la pynkit noh shapoh ka hospital na ka bynta ban aijingsumar hynrei la pynbna ba ula dep khlad noh.
Ha kawei pat ka bynta, u Anil Malakar uba dei u nongtrei ka tnat railway la ithuh kum u briew uba donkti ha kaba iasylla halor katei ka jingjia shah ther kuli Lumding.
Ki bor pulit ka Assam ha ka 15 tarik u Naiwieng ba la dep kila ioh ban kem noh ia uwei u briew uba don ka jingiadei bad ka kynhun seng lehnoh United Liberation Front of Asom Independent (ULFA-I) na Jorhat district ka Assam.
Katkum ki tyllong khubor, utei u briew uba don jingiadei bad ka ULFA(I) ula shah kem noh namar ka jingdonkti ha kaba aijingiarap ia ki dkhot jong kane ka kynhun ha ka por ba kila pynlong ka jingthombor pyrshah ia ki shipai Indian Army kaba la jia ha ka 14 tarik u Naiwieng ba la dep.
Ia une u briew ba la ioh kem noh la tip kyrteng kum u Maina Borgohain.Une u briew ula don mynta ha ka jingpeit jong ki pulit na Kakojan bad ka jingtohkit kaba bniah halor ka jingiadon bynta jong u bad katei ka kynhun kieng atiar ka dang iaid shakhmat.
