New Delhi, Nohprah 12 : U Myntri Rangbahduh (PM) Narendra Modi u lah ban pynlong ka jingwan jurip sha ka jylla Tripura bad Meghalaya ha ka 18 tarik mynta u bnai ha kaba u lah ruh ban sdang ia ka jingialap ilekshon.
Ha kawei pat ka liang, ka BJP kala kyntu ia ki nongtrei jong ka party ba kin pyrto jur halor ki projek kam pynpoi ba la lamkhmat da ka sorkar jong u PM Modi ha ka thain shatei lammihngi (Northeast) khnang ban lah ban iakhun pyrshah halor kino kino ki jingia-aireng da ki party liang pyrshah.
Lah ban kdew ba ha ka jingialang kaba la long hashwa ka jingpynlong ia ka ilekshon Assembly ha Tripura, na ka liang u PM Modi ula tyrwa ban pynlong ka jingwan jurip sha kane ka jylla Northeast ha ka 18 tarik mynta u bnai, la rai ruh ban pynpaw halor ki jingdonkam bad ki jingkongsan jong ka sorkar u Modi na ka bynta kane ka thain naduh ka snem 2014.
Kum ban shu kdew, ha ka jingialang kaba la long ha Tripura, na ka liang u Myntri ka sorkar pdeng u Amit Shah ula pynpaw ka jingbynniaw halor ka jingmih jong ka jingsngew iapher kynhun hapoh ka seng BJP ha Tripura ha kaba ula bthah ruh ia ki nongialam ba kin kiar ban pynmih ia kum kine ki jinglong jingman hadien habud.
Kane ka jinglong jingman kala wan long hadien ba ki nongialam ka BJP Tripura hapoh ka jingalam jong u Myntri Rangbah (CM) Manik Saha kila wan iashim bynta ha ka jingialang ba kyrpang kaba la long ha ka 11 tarik mynta u bnai ha Delhi ia kaba la khot pynlong da u Amit Shah da ka jingthmu ban weng ia kitei ki jingiakynad hapoh ka party ka jylla bad ban shim ia ki sienjam na ka bynta kane ka ilekshon assembly ka ban wan.
Nalor u national president ka BJP u JP Nadda, u president ka party na Tripura u Rajib Bhattacharjee, u Deputy CM, u Jishnu Dev Varma, ka myntri ka sorkar pdeng ka Pratima Bhowmik, u MP ka Rajya Sabha uba dei ruh u CM barim ka Tripura u Biplab Kumar Deb ruh kila wan iashim bynta lang ha katei ka jingialang.
