Shillong, Nohprah 11 : Ka Jylla Meghalaya kala ioh ia ka khusnam ka Ri halor ka jinglah kynjoh ia ka thong ban lah pyntreikam haduh 448 tylli ki Health & Wellness Centre (AB-HWC) hapoh ka Ayushman Bharat Comprehensive Primary Health Coverage Program.
Ia kane ka khusnam la pdiang da u Mission Director ka National Health Mission (NHM) Meghalaya u Ramkumar S (IAS) bad i Dr. Rilynti Lyngdoh, Jt.Director ka Health Services (MCH&FW) cum State Nodal Officer CHPC ha ka Convention ba arsngi halor ka “Universal Health Coverage Day (UHC) 2022” kaba la pynlong ha Varanasi, Uttar Pradesh da ka Ministry of Health & Family Welfare.
“Ngi da sngew burom ban ioh ia ka jingithuh ia ka jingshimkhia jong ka Jylla ban kynnoh ia palat 425 tylli ki Health & Wellness Centre kiba treikam. Ngi la lah ban kynjoh ia kane ka thong hapoh ka por bala buh namar ka jingtrei shitom jong ki kynhun ha ki District bad ka Jylla khamtam ki Mid-Level Health Providers (MLHP), kiba la aiti lut ban pynthikna ba kine ki HWC kin ai ia ki lad jingsumar ba paka sha baroh ki nongshongshnong” ong I Dr.Rilynti.
Ha kane ka prokram, 18 tylli ki Urban Health Centre, 114 tylli ki Public Health Centre bad 318 tylli ki Sub Centre la kyntiew kyrdan sha ka AB-HWC ha Jylla Meghalaya.
Kine ki HWC ki dei kiba la mang ban ai ia ka jingshakri kiba bun ba palat ia ka jingsumar ia ki Longkmie ba punkhun/iohkhunrit bad ki Khunlung khynnah ban kynthup ruh ia kiwei pat ki jingpang bym iabit, sumar ia kiba pang shyntur, khmat bad ENT, Mental Health nalor ka jingai dawai ei bad jingsumar ei bad kiwei kiwei.
Ki Health & Wellness Centre ha Meghalaya kila ai palat 60,000 tylli ki tele-consultation service tang hapoh ka shisnem, kaba wan ba-ar na kiba bun tam napdeng ki Jylla ka thain Shatei Lam Mihngi. Kum kane ka jingiathuh ia ki Nongtrei ka Koit ka Khiah ruh yn sa leh shen.
